Në prag të dy ndeshjeve miqësore, kanë folur edhe dy futbollistët e parë kuqezinj. Me shumë emocione u shfaq Kristjan Asllani, për të cilin sfida me Italinë, ashtu si për shumë ata që janë rritur në vendin fqinj, është shumë speciale. Mesfushori i Interit pohoi se ai ka ikur 2 vjeç në Itali dhe të luash kundër kampionëve të Evropës është diçka emocionuese.
“Do jetë një ndeshje e veçantë për mua që jetoj në Itali prej moshës 2 vjeçare. Kam shumë shokë atje. Ndeshje e vështirë, por do provojmë të lumturojmë njerëzit tanë.
Ngacmime? Jo nuk ka pasur, por më kanë pyetur se kur do luajmë, ku do rrinë ata dhe kështu gjërash. Mezi po e pres si ndeshje.
Italia ka nivel shumë të lartë, por ne do provojmë të bëjmë ndeshjen tonë, pasi kemi shumë kualitet. Gjërat shkojnë mirë kur skuadra fiton, kur nuk ndodh ka zëra.
Grupi është bashkë, jemi të gjithë shokë dhe shumë të bashkuar. Le të vazhdojmë kështu. Përgjegjësia duhet, shpresoj të marr sa më shumë minuta në Kombëtare, që të marr besim te vetja.
Rasti i Barcelonës? Normal që më vjen në mendje, por ekipi dhe të gjithë më kanë qëndruar afër. Ishte rast historik, por gjithsesi e kaluam turnin.
Interi? Jam lojtar i ri, kam përpara Brozovic dhe Calhanoglu, nga të cilët mund të mësoj. Jam i lumtur me kaq minuta që kam luajtur, nuk është e lehtë.
Reja? Shpresojmë të bëjmë mirë, të ndihmojmë trajnerin, t’i japim besim atij dhe t’i fitojmë këto dy ndeshje.
Shqipëria më e mirë? Nuk e di, por kjo mund të jetë Shqipëria më e fortë, pasi kemi lojtarë të fortë dhe teknikë. Shpresoj t’i bëjmë të lumtur të gjithë tifozët.
Shorti i Euro 2024? Kemi shumë shanse të kalojmë”, përfundoi 20-vjeçari i talentuar nga Elbasani, i cili po luan sezonin e parë me Interin në Serie A.
VAZHDO TË LEXOSH MË TEPËR PËR TEMËN
Reja i emocionuar para Italisë: Do t’i këndoj të dy himnet
Reja rikthen Muçin dhe fton 3 lojtarë të Superiores
