Gerard Pique do të përjetojë këtë të shtunë një ditë shumë të veçantë. Mbrojtësi qendror i Barçës, i cili njoftoi të enjten e kaluar se po largohet nga futbolli I luajtur, do të zhvillojë kundër Almerías atë që do të jetë ndeshja e tij e fundit në “Camp Nou”.
Skuadra katalanase, siç shpjegohet në faqen e saj zyrtare, ka përgatitur një sërë veprimesh që do të shërbejnë për të nderuar një futbollist që ka mbrojtur ngjyrat e Barçës në 14 vite e gjysmë. Që nga viti 2008, ai ka luajtur 615 ndeshje zyrtare dhe ka fituar 30 tituj me blaugranat, duke u bërë legjendë e Barcelonës.
Aktiviteti i parë do të zhvillohet pak minuta para ndeshjes Barça-Almería, ku do të shpaloset një telajo me fjalën ‘Sempr3’, duke bërë lojë fjalësh me numrin historik ‘3’ të mbrojtësit, i cili do të vishet në fushën e ‘Camp Nou’.
Pak çaste më vonë, lojtarët e Barcelonës do të nxehen në fushë me emrin ‘Piqué’ të shkruar në secilën prej fanellave të tyre, përveç ‘Sempr3’ të lartpërmendur në gjoks, në nderim të qendërmbrojtësit.
Ekrani i rezultateve të ‘Camp Nou’ do të shfaqë gjithashtu një video në nderim të lojtarit të pestë me më shumë ndeshje në të gjithë historinë e klubit të Barçës. Në fund të ndeshjes ai do të bëjë një xhiro nderi rreth fushës, në një ditë që pritet të jetë shumë emocionuese dhe e veçantë për Barcelonën.
