Didier Deshamp do të jetë trajneri i Francës të paktën edhe për 3 vitet e ardhshme. Vendimi është zyrtarizuar sot me nëj komunikatë nga Federata Franceze e Futbollit e cila bëri të ditur se ishte arritur akordi për rinovimin e marrëveshjes me teknikun i cili ka çuar këtë përfaqësuese në finalen e një Europiani dhe në dy të Botërorëve, duke fituar atë të vitit 2018.
Pas shumë ditësh negociata, Federata bëri të ditur se Deshamp kishte firmosur deri në fundin e vitit 2028, që do të thotë se do të jetë në drejtimin edhe në Botërorin e ardhshëm, që ishte objektivi kryesor i teknikut 54-vjeçar që synon të ringjitet në majën e futbollit botëror me këtë përfaqësuese.
“I emëruar në 9 korrik 2012, Deshamp ka një bilanc të jashtëzakonshëm në drejtimin e përfaqësueses me 89 fitore, 28 barazime dhe 22 humbje në 139 ndeshje me 279 gola të shënuar dhe 119 të pësuar. Në drejtimin e tij, Franca fitoi Botërorin në vitin 2018, Ligën e Kombeve në vitin 2021, arriti në finalen e Euro 2016 dhe Botërorit 2022. Aktualisht mban vendin e tretë në klasifikimin FIFA-s ku ka qenë gjithmonë mes katër të parave në pesë vitet e fundit”, shkruhet në komunikatën e Federatës Franceze që njoftonte rinovimin.
Mediat franceze kishin bërë të ditur se gjatë këtyre ditëve, e vetmja gjë që mbante peng firmën ishte dëshira nga Federata Franceze që të rinovonte deri në Europianin e ardhshëm. Por në fund u dorëzua para kërkesës së Deshamp për të rinovuar deri për Botëror, pasi për të flitnin rezultatet e shkëlqyera, pavarësisht se për shumëkënd, në dy turnetë e fundit francezët kishin dështuar duke mos arritur të siguronin trofeun.
