Presidenti i Turqisë, Rexhep Tajip Erdogan po përballet me kritika të shumta nga ana e opozitës, për keqmenaxhim të situatës së tërmetit të fuqishëm që shkaktoi dhjetëra mijëra njerëz të vdekur duke u shprehur se shteti ka reguar me vonesë dhe se presidenti duhet të angazhohet e të mbaje përgjegjësi më të mëdha në këtë situatë tragjike. Gjatë një vizite në një nga rajonet më të goditura, presidenti turk tha se numri zyrtar i të vdekurve në Turqi ishte rritur në 9,057. Lideri kryesor i opozitës e ka fajësuar atë për shkallën e shkatërrimit. Por Erdogan u kundërpërgjigj, duke thënë se nuk ishte e mundur të përgatitesh për një fatkeqësi kaq të madhe.
Shumë në zonat më të prekura kanë kritikuar reagimin e Autoritetit Turk të Menaxhimit të Fatkeqësive dhe Emergjencave (AFAD) si shumë të ngadaltë. Të tjerë thonë se qeveria nuk ishte e përgatitur sa duhet paraprakisht, shkruan BBC.
“Nëse ka një person përgjegjës për këtë, ai është Erdogan,” tha Kemal Kilicdaroglu, kreu i partisë kryesore opozitare të Turqisë.
Presidenti e hodhi poshtë këtë. Ai gjithashtu i përshkroi ata që thanë se nuk i kishin parë fare forcat e sigurisë në disa zona si “provokatorë”.
“Kjo është një kohë për unitet, solidaritet. Në një periudhë si kjo, nuk mund të mërzis njerëzit që kryejnë fushata negative për interesa politike,” u tha ai gazetarëve në Hatay.
Gjatë një ndalese tjetër në turneun e tij në zonat në zonën e fatkeqësisë më herët sot, ai pranoi disa probleme fillestare, por tha se situata tani ishte “nën kontroll”.
Opozita është bashkuar në një aleancë të partive të qendrës së majtë dhe të djathtë. Kilicdaroglu pritet të jetë kandidati presidencial përballë Erdogan. Në një video të postuar në Tëitter, ai u zotua se nuk do ta takonte presidentin “në asnjë platformë”, duke akuzuar qeverinë se po kryen “punë për PR” pas tërmeteve.
Zemërimi po rritet gjithashtu për një “taksë tërmetesh” të vendosur nga qeveria turke pas tërmetit masiv të 1999 që vrau më shumë se 17 mijë njerëz. Rreth 88 miliardë lira (4.6 miliardë dollarë) thuhet se janë shpenzuar për parandalimin e fatkeqësive dhe modernizimin e shërbimeve të urgjencës.
Pikëpyetje ngrihen sa herë ka tërmet në Turqi, por qeveria nuk ka shpjeguar kurrë publikisht se si shpenzohen paratë. Opozitari Kilicdaroglu tha se qeveria e Erdogan “nuk ishte përgatitur për asnjë tërmet në 20 vjet”. Por nuk është vetëm rivali kryesor politik i presidentit që po shpreh zemërimin për mungesën e gatishmërisë së qeverisë.
“Ku kanë shkuar të gjitha taksat tona, të mbledhura që nga viti 1999?” – thotë Celal Deniz, 61 vjeç në qytetin e Gaziantep. Vëllai dhe nipërit e tij mbeten të bllokuar nën rrënoja.
Përdoruesit e rrjeteve sociale kanë kritikuar gjithashtu TV-të kryesore dhe proqeveritare turke për “heshtje” ndaj kritikave nga njerëzit në zonat e prekura. Janë shpërndarë video që tregojnë një korrespondent të NTV në qytezën Kahramanmaras që thoshte se vendasit ankoheshin se “ndihma është e pamjaftueshme” ndërsa banorët që dëgjoheshin në sfond duke pyetur: “Ku është shteti?”
Më pas, kanali duket se e hoqi nga puna korrespondentin përpara se ai të kthehej në redaksi. Një video tjetër e shpërndarë në internet tregoi një të mbijetuar duke i thënë një gazetari në rrjetin kryesor Haberturk se “askush nuk kishte ardhur” për t’i shpëtuar ata prej ditësh. Gazetari më pas largohet nga i mbijetuari dhe thotë se forcat e kërkimit kanë qenë “duke kërkuar kudo”.
Erdogan pranoi se kishte pasur vështirësi me reagimin fillestar ndaj katastrofës, por për vonesat fajësoi rrugët dhe aeroportet e dëmtuara. Ai tha se njerëzit duhet të dëgjojnë vetëm komunikimin nga autoritetet dhe të injorojnë “provokatorët”.
VAZHDO TË LEXOSH MË TEPËR PËR TEMËN
“Turqia ndërhyri për marrëveshjen e detit me Greqinë”
Më shumë se 1200 të vdekur nga tërmeti që tronditi Turqinë dhe Sirinë!
Mbi 2600 viktima dhe mijëra të plagosur nga tërmeti, Erdogan shpall shtatë ditë zie kombëtare
