Kupa e Shqipërisë ka mësuar sot dy çiftet e fazës gjysmëfinale. Vllaznia luan me Egnatian dhe Tirana përballet me Teutën.
Në ambientet e stadiumit “Air Albania”, Federata Shqiptare e Futbollit ka zhvilluar shortin e lirë, teksa nga goglat janë zbardhur edhe ndeshjet e mësipërme. Përballjet e para për gjysmëfinalet do luhen në 26 prill dhe ndeshjet e kthimit në 11 maj.
Në bazë të rezultatit të këtyre ndeshjeve, do përcaktohen edhe dy skuadrat finaliste që do përballen në finalen e madhe të 1 qershorit në “Air Albania”.
Vllaznia vjen në këtë fazë pasi ka fituar në dy edicionet e fundit trofeun e Kupës së Shqipërisë, ndërsa në total numëron 8 kupa të fituara. Gjysmëfinalistja tjetër Tirana mban edhe rekordin, duke u shpallur 16 herë fituese e Kupës së Shqipërisë, kurse Teuta e ka fituar 4 herë Kupën. Egnatia është e vetmja nga katër gjysmëfinalistet që nuk e ka fituar asnjëherë më parë këtë trofe.
Pas hedhjes së shortit, për mediat folën përfaqësues të klubeve.
Kupa e Shqipërisë, ndeshjet gjysmëfinale:
26 prill ndeshjet e para
Vllaznia – Egnatia
Tirana – Teuta
11 maj ndeshjet e kthimit
Egnatia – Vllaznia
Teuta – Tirana
Pas shortit, për mediet foli drejtori sportiv i Tiranës, Tefik Osmani. Sipas tij, Tirana e ka të fituar kampionatin dhe kërkon edhe Kupën.
“Të them të drejtën të tre skuadrat ishin të forta. Është ndeshje shumë e rëndësishme, sepse të dyja ndeshjet të çojnë në finale. Ka një tjetër specifikë Kupa, që e arrin shumë shpejt një trofe. Nuk është si kampionati që janë shumë ndeshje. Do ta vlerësojmë në maksimum dhe besoj se do të dalim me sukses. Të them të drejtën, si stafi dhe unë mendojmë se titullin kampion e kemi të fituar. Besoj se do të ishte e bukur që të fitonim edhe Kupën. Mendoj që Tirana qëkur është krijuar gjithmonë e ka pasur bindjen e saj që titulli kampion edhe Kupa duhen fituar”, tha korçari.
Më pas Osmani u ndal edhe te dëmtimet, teksa tregoi arsyen se përse skuadra nuk luan në “Air Albania”, por është zhvendosur në kryeqytet.
“Pak a shumë e dini dëmtimin e Patrick. Besoj që Abazajn ta kemi gati. Gjithmonë ne jemi bazuar te elementët e rinj që ne besojmë shumë që kanë një të ardhur shumë të ndritur përpara, jo vetëm te Tirana, por edhe jashtë kufijve. Është marrë një vendim që stadiumi “Air Albania” do të jetë i mbyllur për shkak të problemeve që ndodhën në derbi. Normalisht që ne kemi luajtur dhe ndeshje të tjera në Elbasan. Vërtet fusha është fantastike. Ambienti pothuajse është njësoj. Nuk besoj se do të ketë problem”, përfundoi Osmani.
Drejtori sportiv i Vllaznisë, Vioresin Sinani tha se ekipi i tij do jetë në finalen e Kupës.
“Mendoj se të katërt skuadrat janë të forta. Vetë kampionati e ka treguar se diferencat janë të vogla. Egnatia ka treguar gjatë kampionatit që ka stabilitet dhe ka lojtarë cilësorë. Por Vllaznia do zhvillojë ndeshje të mira me Egnatian dhe do të shkojë në finale. Shpresoj që ky është momenti që Vllaznia të kualifikohet me Egnatian dhe të dalë në finale me njërën prej fituese të çiftit tjetër. Egnatia ka një ekip me lojtarë mjaft të mirë, por jam i bindur që kësaj radhe është radha jonë”, tha Sinani
Presidenti i Egnatias, Agim Demrozi ka vendosur në pah cilësitë e ekipit të tij.
“Jam i kënaqur me shortin. Por edhe po të na binin ekipe të tjera, ju tashmë e keni parë Egnatian që është një ekip i fortë. Do të bëjmë maksimumin që të arrijmë finalen e Kupës. Objektivat i kemi shpallur që në fillim të kampionatit që është Europa. Pastaj se nga vjen, nga kampionati ose nga Kupa, mirë se të vij. E prisnim këtë reagim të skuadrës sepse kemi punuar dhe investuar shumë për këtë ditë”, tha fillimisht Demrozi.
Ambicioz te Egnatia, teksa kërkojnë Europën nga Kupa ose kampionati.
“Ne jemi aty dhe luajmë shanset tona deri në fund. Edhe mund ta fitojmë Kupën, nuk është habi. Shpresojmë që të mbajmë vendin e tretë. Kukësi është një ekip i fortë. Ne do të shkojmë që të bëjmë lojën tonë edhe shpresoj që të kthehemi me tre pikë. Shkodër apo Rrogozhinë? Nuk ka diferencë. Ekipet janë të gjitha njëlloj dhe ndeshja e parë në Shkodër më mirë që e kemi jashtë fushe. Presim ndeshjen e dytë që e kemi në fushën tonë”, tha kreu i rrogozhinasve.
