Kryeministri grek Kyriakos Mitsotakis ka kërkuar falje për tragjedinë e ndodhur në Tempi ku mbi 50 persona humbën jetën nga përplasja e dy trenave.
Përmes një postimi në Facebook, ai kërkon falje personalisht por edhe në emër të të gjithë atyre që kanë qeverisur vendin prej vitesh.
Misotakis thekson se nuk do të fshihet pas gabimit njerëzor, pasi po të kishte përfunduar projekti i telekomandimit, ky aksident do të ishte praktikisht i pamundur të ndodhte.
“Fakti që Sistemi i Kontrollit Dixhital do të jetë plotësisht funksional brenda muajve të ardhshëm nuk është justifikim, përkundrazi ma shton dhimbjen që nuk arritëm ta përfundonim para se të ndodhte e keqja”, thekson kryeministri.
Ai garantoi një hetim të shpejtë të tragjedisë dhe përgjegjësi. Ai shton gjithashtu se do t’u propozojë të gjitha palëve që tani e tutje të angazhohen që në Parlamentin e ardhshëm të krijohet një Komision i Posaçëm për të hetuar historinë e dhimbshme të hekurudhave greke përgjatë njëzet viteve të fundit.
Pjesë nga postimi:
Si kryeministër i kam borxh të gjithëve, por mbi të gjitha të afërmve të viktimave, një ndjesë të madhe si personalisht, ashtu edhe në emër të të gjithë atyre që drejtuan vendin prej vitesh. Sepse vërtet në Greqinë e vitit 2023 nuk është e mundur që dy trena të lëvizin në drejtime të kundërta në të njëjtën linjë dhe të mos bien në sy nga askush.
Ne nuk mund, nuk duhet të fshihemi pas gabimeve njerëzore. Nëse puna me telekomandë do të kishte përfunduar, ky aksident do të ishte praktikisht i pamundur të kishte ndodhur. Fakti që Sistemi i Kontrollit Dixhital do të jetë plotësisht funksional brenda muajve të ardhshëm nuk është justifikim, përkundrazi ma shton dhimbjen që nuk arritëm ta përfundonim para se të ndodhte e keqja.
Drejtësia do të hetojë tragjedinë dhe do të caktojë përgjegjësit. Tani e kemi për detyrë të qëndrojmë pranë familjeve të viktimave, duke pranuar me guxim gabimet e shtetit.
Por edhe këto nuk mjaftojnë. Unë do t’i kërkoj menjëherë Komisionit Evropian dhe vendeve mike ndihmën e tyre në aspektin e njohurive në mënyrë që më në fund të marrim trena modernë. Dhe unë do të luftoj për fonde shtesë të komunitetit për të ruajtur dhe përmirësuar me shpejtësi rrjetin ekzistues.
Së fundi, do t’u propozoj të gjitha palëve që në Parlamentin e ardhshëm të ngrihet një Komision i Posaçëm për të hetuar historinë e dhimbshme të hekurudhave greke gjatë njëzet viteve të fundit. Ajo që nuk është bërë për kaq shumë vite duhet bërë tani dhe shpejt.
E di që sot shumë do të kujtojnë frazën e një prej paraardhësve të mi se “kjo është Greqia” . Por jo, nuk është vetëm ajo. Është një Greqi tjetër, atje jashtë, që na jep shpresë, besim dhe forcë.
Të gjithë e pamë pas aksidentit tragjik. Për zjarrfikësit, shpëtimtarët dhe EKAV që ndodheshin aty që në momentin e parë. Mjekët dhe ndihmësmjekët të cilët kanë organizuar menjëherë mjekimin e të plagosurve.
Fytyrën e Greqisë më të mirë e pamë edhe tek pasagjerët që rrezikuan jetën për të shpëtuar bashkëudhëtarët.
Personalisht jam në politikë për të ndryshuar këtë “vend të keq”, këtë Greqi të vjetër që dhemb. Kjo është arsyeja pse unë përpiqem çdo ditë. Ndonjëherë kam sukses dhe ndonjëherë jo. Megjithatë, e di mirë se sa më mirë mund ta bëjmë vendin tonë nëse fshijmë mbetjet e së kaluarës që na mbajnë prapa. Dhe për këtë Greqi që meritojmë do të vazhdoj të luftoj.
VAZHDO TË LEXOSH MË TEPËR PËR TEMËN
Këta janë shqiptarët që dyshohen mes viktimave në Greqi
