Partia Demokratike e drejtuar nga Enkelejd Alibeaj do të ankimojë vendimin e Komisionit Qendror të Zgjedhjeve për të mos e regjistruar në zgjedhjet vendore të 14 majit për shkak të mungesës së dokumentacionit.
KQZ nuk e pranoi autorizimin që i jepte të drejtë Enkelejd Alibeajt të angjazhohet në zgjedhjet vendore në emër të Lulzim Bashës, por kërkoi një dokument me firmë nga ish-kryedemokrati, i cili “në letra” rezulton të jetë ende kryetar i PD-së.
Basha figuron si kryetar për shkak sepse pas dorëheqjes, kjo forcë politike nuk zgjodhi një kryetar të ri, regjistrimin e të cilit do të duhej më pas ta bënte në gjykatë. Alibeaj është aktualisht kryetar i komanduar.
Menjëherë pas vendimit të KQZ-së, deputeti demokrat Gazment Bardhi deklaroi se PD i ka dorëzuar të gjitha dokumentet dhe nuk ka më se çfarë të dorëzojë. Ndërsa përfaqësuesit ligjorë të Alibeajt, do të ankimojnë tashmë vendimin e KQZ-së në KAS. Sipas Bardhit, kërkesa e Ilirjan Celibashit ishte më tepër politike.
Ndërsa grupimi i “Rithemelimit”, apo PD-ja e drejtuar nga Sali Berisha, nuk është pranuar në KQZ. Për shkak se ata nuk mund të hyjnë në koalicion me Partinë e Lirisë, pasi kjo e fundit ka paraqitur lista për këshilltarë kryebashkiakë, me gjasë do të kërkojnë koalicion, siç u përfol dje, me parti si PAA dhe PBDNJ.
Berisha hodhi poshtë çdo mundësi për negociata me Alibeajn, në mënyrë që PD të dalë me kandidatë unikë në zgjedhje.
VAZHDO TË LEXOSH MË TEPËR PËR TEMËN
PD rrezikon regjistrimin në KQZ për zgjedhjet
