Bruno Telushi nuk është më pjesë e Partizanit. Pas ndeshjes në Champions League, barazuar 1-1 me BATE Borisov për turin e I kualifikues, “Demat” mbeten pa kapiten. Duket se vlonjati nuk e ka kapërdirë qëndrimin në stol, duke dashur largimin.
“Partizani njofton mbylljen e bashkëpunimit me Bruno Telushin. Mesfushori dhe klubi kanë vendosur të ndërpresin me mirëkuptim kontratën mes tyre. Falenderojmë Bruno Telushin për kontributin e dhënë në këtë sezon, ku për një pjesë të ndeshjeve mbajti edhe shiritin e kapitenit. Klubi i uron shumë suksese Telushit në vazhdim të karrierës së tij”, njofton Partizani.
32-vjeçari largohet për herë të dytë nga të kuqtë, pasi edhe më herët në 2020 la Partizanin për të kaluar te Kukësi. Mesfushori dhe klubi duket se kanë pasur “shkëndija” pas ndeshjes së fundit në Champions dhe zgjidhja më e mirë është parë largimi i tij nga ekipi.
Në karrierën e tij, Telushi ka luajtur me klube se Flamurtari, Kukësi, Egnatia, Virtus Entella, Slaven Belupo apo edhe Neftchi Baku. Palët kishin kontratë deri në verën e 2024, me të drejtë rinovimi edhe për një vit. Duket se klima në kampin e kuq është e nxehtë këtë verë, me Telushin që ka fituar dy tituj kampion me “Demat” dhe një Superkupë.
