Daçiç “i bindet” Vuçiçit për zgjedhjet në Serbi

Presidenti i Serbisë, Aleksandër Vuçiç, ka shpallur sërish zgjedhjet në prill ose maj 2024. Megjithatë, duket se vendimi i tij fsheh një sërë prapaskenash, në përpjekje për të “mbajtur me thonj” pushtetin, në një kohë kur karrigia e tij lëkundet më shumë se kurrë. Bashkëbiseduesit e medias serbe “Danas” theksojnë se data e zgjedhjeve lokale është padyshim në pranverën e vitit të ardhshëm, ndaj bashkimi me ato parlamentare sigurisht do të ndodhë. Sakaq, ministri i Punëve të Jashtme Ivica Daçiç theksoi se është evidente se këtë vit në Serbi nuk do të mbahen zgjedhje dhe se vitin e ardhshëm do të hyjmë në vitin zgjedhor. Siç theksoi ai, kursi i SPS-së nuk do të ndryshojë, sepse prej vitesh ka pasur bashkëpunim të mirë me partinë në pushtet. Shefi i diplomacisë serbe theksoi se të gjithë janë dakord që zgjedhjet të mbahen vitin e ardhshëm dhe në çfarë niveli do të jenë, është çështje e vlerësimit politik. “Shkurtimi i mandateve nuk është i mirë për institucionet, sepse nuk keni afate që duhet t’i vendosni si synime, veçanërisht nëse nuk ka krizë sa i përket numrit të votave në parlament. Së dyti, nuk kam parë që partitë opozitare të jenë tepër euforike kur bëhet fjalë për zgjedhjet. Tani kemi hyrë në faktin se me siguri nuk do të ketë asnjë të tillë këtë vit. Të gjithë pajtohen se duhet të jetë vitin e ardhshëm dhe pastaj të mbahen zgjedhjet e rregullta. Dhe nëse do të jetë në nivelin e Serbisë apo Beogradit, kjo është çështje e vlerësimit politik”, tha Daçiç. Ai shtoi se Serbia është i vetmi vend ku kreu i koalicionit qeverisës ofron zgjedhjet e opozitës, por ata nuk pranojnë. Ai gjithashtu thekson se partia e tij nuk do të ndryshojë drejtim, pasi s’ka frikë nga zgjedhjet.