Peshëngritësi shqiptar, Ertian Kofsha i ka dhuruar tre medalje vendit dhe ka siguruar titullin kampion në stilin e shkëputjes, në Kampionatin Evropian për moshën nga 20-23 vjeç që po zhvillohet në kryeqytetin e Rumanisë, Bukuresht.
Kofsha ishte i artë në stilin e shkëputjes, kjo me 153 kilogramë të ngritura në peshën deri 89 kg. Sportisti kuqezi më pas siguroi medaljen e bronztë në stilin e shtytjes, ndërsa ngriti 184 kilogramë dhe po i bronztë edhe në dygarësh me 337 kilogramë në total.
Në këtë aktivitet ka marrë pjesë dhe Enkileda Carja, Kampionia e Europës për moshën deri në 15 vjeç, e cila me 187 kilogramë vendosi rekord të ri Europian për këtë grupmoshë.
Samoel Rrasa është renditur i gjashti, ndërsa një formë të mirë ka paraqitur dhe Sajmir Lagja. Kështu me tre medaljet e Ertian Kofshës, një e artë dhe dy të bronzta, peshëngritja shqiptare nderohet në Europian dhe ka një të ardhme të sigurt.
