Pas amerikanëve edhe britanikët duket se kanë zhvilluar biseda dhe takime të fshehta me rusët, ku është diskutuar lidhur me konfliktin në Ukrainë, por pa dijeninë e Kievit.
Media britanike Sky News raporton se zyrtarët britanikë janë angazhuar në diskutime diplomatike me përfaqësuesit kryesorë të Kremlinit, në lidhje me sigurinë globale në mes të konfliktit të vazhdueshëm në Ukrainë.
Takimet e fshehta mësohet se kanë ndodhur gjatë 18 muajve të fundit, duke u vendosur në vende të ndryshme si Vjena dhe New York-u, si pjesë e përpjekjeve diplomatike në prapaskenë.
Diskutimet janë rrotulluar kryesisht rreth shqetësimeve të sigurisë që ndikojnë si në Mbretërinë e Bashkuar ashtu edhe në komunitetin ndërkombëtar, duke përfshirë tema të tilla si mungesa e grurit dhe siguria bërthamore.
Por Britania e Madhe nuk ka ndjekur në mënyrë aktive negociatat e paqes, që synojnë një zgjidhje diplomatike të konfliktit, siç konfirmohet nga një diplomat i lartë britanik që mori pjesë në disa nga këto biseda.
“Ne kemi mbajtur kontakte dhe mendojmë se është thelbësore të mbajmë një dialog të hapur gjatë luftës në Ukrainë. Ne në asnjë mënyrë nuk po ndajmë pjesë të vendit apo nuk bëjmë marrëveshje paqeje në emër të dikujt, por është shumë e rëndësishme ta mbajmë të hapur këtë linjë kontakti”, tha ai.
Një zëdhënës i Zyrës së Jashtme, Commonwealth-it dhe Zhvillimit (FCDO), informoi se takimet me zyrtarët rusë janë zhvilluar vërtet, por vetëm kur ato janë konsideruar “absolutisht të nevojshme”.
Zëdhënësi hodhi poshtë gjithashtu çdo pohim që sugjeronte se këto diskutime synonin të negocionin përfundimin e konfliktit të Ukrainës, duke i konsideruar pretendime të tilla “as të besueshme dhe as të sakta”./SkyNews
