Europa përballet me një rrezik të lartë të sulmeve terroriste gjatë festave të Krishtlindjeve për shkak të tensioneve për luftën midis Izraelit dhe Hamasit, ka paralajmëruar komisionerja e BE-së për Çështjet e Brendshme, Ylva Johansson. “Polarizimi në shoqëritë evropiane si pasojë e konfliktit në Lindjen e Mesme ka rritur rrezikun e sulmeve”, Ylva Johansson. Ministrja gjermane e Brendshme Nancy Faeser vuri në dukje se vrasja e një turisti të ri gjerman pranë Kullës Eifel fundjavën e kaluar tregoi se sa akut dhe serioz është kërcënimi i terrorizmit islamik në këtë moment në BE. “Lufta në Gaza dhe terrori i Hamasit e përkeqësojnë këtë situatë. Rreziku i emocionalizimit dhe radikalizimit të mëtejshëm të islamistëve të dhunshëm është i lartë,” tha ministrja gjermane në një takim të përbashkët të ministrave të brendshëm evropianë. Ajo tha se autoritetet e sigurisë së vendeve evropiane po bashkëpunojnë ngushtë për këtë. “Kërcënimet islamike duhet t’i monitorojmë veçanërisht nga afër dhe së bashku me vendet fqinje të marrim masa kundër propagandës islamike”, theksoi ministrja federale e policisë gjermane.
Sulmet terroriste
Armand Rajabpour-Miyandoab, 26 vjeç u arrestua për vrasjen e një turisti gjerman në Paris pasi plagosi një britanik 66-vjeçar dhe një francez 60-vjeçar. Ai i tha policisë se donte të hakmerrej për “persekutimin mbarëbotëror të myslimanëve”. Ndër të tjera ai e arsyetoi sulmin me dhunë ndaj palestinezëve. Javën e kaluar, dy adoleshentë u arrestuan në Gjermani dhe u akuzuan për planifikimin e një sulmi islamik me kamion bombë në një treg apo sinagogë Krishtlindjesh. Në mes të tetorit, një tunizian u qëllua në Bruksel pasi përdori një pushkë për të vrarë dy tifozë suedezë, duke përmendur ISIS-in. Austria, Belgjika, Franca, Gjermania, Spanja dhe Suedia po ndajnë inteligjencën mes frikës në rritje se terroristët islamikë do të kryejnë një sulm gjatë festave të Krishtlindjeve, raporton Times e Londrës. Në një takim të mërkurën, komisionerja evropiane Johansson njoftoi një shtesë prej 30 milionë eurosh për mbrojtjen e vendeve veçanërisht të cenueshme si sinagogat. Një javë më parë, Zyra Gjermane për Mbrojtjen e Kushtetutës paralajmëroi se rreziku i një sulmi terrorist është më i madh se sa ka qenë për një kohë të gjatë, si pasojë e sulmit të të Hamasit ndaj Izraelit, që rriti ndjeshëm kërcënimin e terrorizmit në Gjermani. Ata veçanërisht paralajmëruan kundër autorëve individualë.
“Ringjallja” e ISIS dhe Al-Kaeda
“Rreziku i mundshëm i sulmeve të mundshme terroriste kundër popullit dhe institucioneve hebreje dhe izraelite, si dhe kundër Perëndimit në tërësi, është rritur ndjeshëm si rezultat,” vlerësoi Zyra Federale Gjermane për Mbrojtjen e Kushtetutës në vlerësimin e saj të fundit të sigurisë, të publikuar javën e kaluar. “Grupet terroriste Al-Kaeda dhe ISIS janë gjithnjë e më të suksesshëm në nxitjen e të rinjve, duke portretizuar viktimat e bombardimeve izraelite në Rripin e Gazës dhe krizën humanitare në territorin palestinez, si pjesë e një strategjie perëndimore anti-muslimane”, raporton “Spiegel”. Presidenti i Zyrës Federale për Mbrojtjen e Kushtetutës, Thomas Haldenwang, vë në dukje rrezikun e radikalizimit të kriminelëve që veprojnë vetëm dhe përdorin mjete të thjeshta për të sulmuar të ashtuquajturat “objektiva të buta”. “Rreziku është real dhe më i madh se sa ka qenë për një kohë të gjatë. Rreziku i sulmeve ka arritur një cilësi të re,” vuri në dukje Haldenwang. Edhe jashtë rrethit xhihadist, myslimanët dhe palestinezët po portretizohen gjithnjë e më shumë si viktima të Perëndimit, në disa raste me mesazhe antisemite, paralajmërojnë gjermanët. Hamasi dhe Hezbollahu janë të ndaluar në Gjermani. Përveç islamistëve, Zyra Gjermane për Mbrojtjen e Kushtetutës i sheh aktualisht ekstremistët palestinezë, ekstremistët e djathtë turq dhe ekstremistët e majtë gjermanë dhe turq si “agjitues dhe mobilizues”. Ekstremistët e majtë gjermanë, raporton “Spiegel”, pranojnë pjesërisht një pozicion pro-izraelit dhe pjesërisht një pro-palestinez.
VAZHDO TË LEXOSH MË TEPËR PËR TEMËN
A do të pranohet Ukraina në NATO?
‘Çelësi’ i fitores së Ukrainës tani është NATO!
