Menjëherë sapo presidenti Aleksandër Vuçiç fitoi zgjedhjet e parakohshme në Serbi dha sinjalin e parë për njohjen e pavarësisë së Kosovës. Këtë fakt e përmendi dhe Bashkimi Evropian, i cili përshëndeti vendimin e qeverisë serbe për njohjen e targave të Republikës së Kosovës dhe e quajti këtë vendim “hap pozitiv në zbatimin e Marrëveshjes për rrugën drejt normalizimit të marrëdhënieve”. Sipas vendimit të Qeverisë së Serbisë, nga 1 janari i vitit të ardhshëm, automjetet me targa RKS (Republika e Kosovës) do të mund të lëvizin në territorin e Serbisë. Për BE-në kjo është zgjidhja përfundimtare e një problemi të vështirë që ka shkaktuar tension dhe trazira në veri të Kosovës në dy vitet e fundit. Deri më tani, shumica e serbëve në veri të Kosovës kishin targa të lëshuara nga Serbia, përfshirë ato me shenja të qyteteve që janë në territorin e Kosovës. Në anën tjetër, makinat nga Kosova me targa të Kosovës për të hyrë në Serbi është dashur të fshehin me letër shenjën RKS. Marrëveshja për lirinë e lëvizjes, e cila përfshin edhe lëvizjen e pakufizuar të automjeteve nga Kosova dhe Serbia në territorin e njërës dhe tjetrës, është nënshkruar më shumë se dhjetë vjet më parë nga ish-qeveria e Serbisë. Kjo tani po përdoret nga qeveria e Aleksandër Vuçiçit si argument kundër kritikave të opozitës se ka njohur simbolet e shtetit të Kosovës. Qeveria e Albin Kurtit prezantoi reciprocitetin dhe ndaloi hyrjen e automjeteve nga Serbia, të cilat gjithashtu duhej të fshihnin shenjat e vendit në targa. Dhe automjeteve në territorin e Kosovës me targa të Serbisë iu dha afat për ndërrim dhe kërcënimi me konfiskim. Kjo çoi në trazira, barrikada dhe djegie të veturave të disave që i ngatërruan me targa të Kosovës. Megjithatë, gjatë dy muajve të fundit, më shumë se 4000 automjete në veri të Kosovës janë riregjistruar nga targa serbe në Kosovë. Pas kësaj, qeveria serbe vendosi të njohë targat e Republikës së Kosovës.
Serbët njohin de fakto Kosovën
Serbia ka vendosur të postojë një njoftim në pikat kufitare se nuk e njeh Kosovën. Mirëpo, diplomatët në BE thonë se ky hap është edhe “një lloj njohjeje de facto e Kosovës dhe zbatim i marrëveshjes” që ndër të tjera kërkon që Kosova dhe Serbia të respektojnë simbolet shtetërore të njëra-tjetrës. “Ky paraqet gjithashtu një hap në drejtimin e duhur drejt një integrimi më të mirë rajonal dhe evropian të Ballkanit Perëndimor, nga i cili në fund të fundit përfitojnë qytetarët. Ky vendim i hap rrugën heqjes së plotë të regjimit të afisheve. BE tani pret që Kosova të përgjigjet në të njëjtin drejtim”, tha Stano. Bashkimi Evropian vazhdon t’i përsërisë thirrjet e tij drejtuar Serbisë dhe Kosovës që “të zbatojnë plotësisht të gjitha pjesët e marrëveshjes pa vonesa dhe parakushte”. Për Kosovën, kjo përfshin obligimin për themelimin e Asociacionit të komunave me shumicë serbe, dhe për Serbinë njohjen de facto të Kosovës përmes respektimit të integritetit territorial të Kosovës, njohjes së dokumenteve dhe simboleve shtetërore, si dhe moskundërshtimit të Kosovës për tu anëtarësuar në ndonjë organizatë ndërkombëtare.
Vuçiç më i pranueshëm për Perëndimin
Kjo është arsyeja pse Perëndimi po e mban akoma në pushtet presidentin serb. Kriminologu kroat Zheljko Cvrtila teksa komentoi protestat kundër parregullsive zgjedhore në Serbi dhe akuzat e Rusisë se pas tyre qëndron Perëndimi tha se kjo gjë është e pamundur. “Është e vështirë për mua të besoj se në këtë moment dikush do të shkonte për të rrëzuar Vuçiçin. Më duket se ai është më i pranueshëm për Perëndimin. Opozita e tyre është krejtësisht e përçarë dhe Perëndimi nuk ka ku të mbështetet, përveç nëse ka informacione se kur të vijë në pushtet, synon të ndryshojë gjërat në raport me Kosovën”, beson kriminalisti. “Unë nuk kam shumë argumente në drejtimin që Perëndimi mund ta drejtojë atë.” Më duket se kjo është një situatë e orkestruar, qeveria lejoi që protestuesit të afroheshin sa më pranë institucioneve, në mënyrë që prona të vihej në dispozicion të protestuesve dhe personave të përfshirë dhe për t’i treguar publikut vendas të gjithë dhunën e opozitës dhe justifikojnë të gjitha veprimet e dhunshme të policisë”, shtoi ai.
VAZHDO TË LEXOSH MË TEPËR PËR TEMËN
