Shërbimi i Sigurisë së Ukrainës (SBU) shpërtheu eksploziv në një linjë hekurudhore në Siberi, të cilën Rusia e përdor për të furnizuar ushtrinë, tha një burim ukrainas për “Reuters”.
Burimi, i cili dëshironte të mbetet anonim, tha se katër eksplozivë u shpërthyen gjatë natës nga e mërkura deri të enjten, ndërsa treni i mallrave po lëvizte përmes tunelit Severomujsky në Buryatia, në kufirin me Mongolinë.
Një sulm i tillë në territorin më shumë se 4000 kilometra nga Ukraina do të thotë se Kievi është i aftë të operojë thellë brenda Rusisë.
Sipas pretendimeve të tyre, “vendi agresor ra dy herë në kurthin e ngritur në hekurudhën Baikal-Amur, e cila është e gjatë 4234 km”.
Burimet ruse konfirmuan se treni mori flakë në atë zonë, por nuk përmendën eksplozivët. Komiteti hetues rus tha në një deklaratë se një tren që transportonte karburant ka marrë flakë në një tunel, se nuk ka viktima dhe se një hetim paraprak është duke u zhvilluar për të përcaktuar shkakun e aksidentit.
Hekurudhat ruse në pronësi të shtetit, e cila zotëron dhe operon rrjetin hekurudhor, tha se treni u ndalua pasi u pa tymi që dilte nga një rezervuar karburanti dizel.
Kompania njoftoi se trafiku hekurudhor ishte ridrejtuar, gjë që rriti pak kohën e udhëtimit, por se vetë transporti nuk ishte pezulluar.
Megjithatë, shpërthimi ka ndodhur edhe në atë rrugë të tërthortë. Shpërthimi i ri ishte faza e dytë e një operacioni special të projektuar për të ndërprerë këtë rrugë të rëndësishme logjistike për Rusinë.
Hekurudha lidh Rusinë me Kinën dhe përdoret, ndër të tjera, për furnizime ushtarake.
Pas shpërthimit të parë, rusët u detyruan të përdorin një rrugë të tërthortë që kalon përmes ‘Urës së Djallit’.
VAZHDO TË LEXOSH MË TEPËR PËR TEMËN
