Ministri i Punëve të Brendshme të Kosovës, Xhelal Sveçla, ka njoftuar se autoritetet serbe i kanë refuzuar vizitën e planifikuar për ditën e sotme në Luginën e Preshevës.
Ai ka thënë se ky vendim i autoriteteve të shtetit fqinj është marrë pa asnjë arsye e as shpjegim.
“Mbrëmë në orët e vona, nga zyrtari ynë ndërlidhës në Beograd jam njoftuar se kërkesa jonë për vizitën e sotme në Luginë është refuzuar nga autoritetet e Serbisë pa asnjë arsye shpjegim”, ka shkruar Sveçla në një postim në Facebook.
Ai ka shtuar se ky akt i Serbisë dëshmon qasjen destruktive dhe shtypjen e vazhdueshme të saj ndaj shqiptarëve të Luginës.
“Ky refuzim pa asnjë arsyetim nga Serbia disa orë para realizimit të vizitës, nuk zbehë qëllimet dhe angazhimin tonë për shqiptarët e Luginës. Ndër të tjera, nuk do të zbehë as dëshirën dhe qëllimin tim për realizim të vizitës atje, për të ndarë me shqiptarët e Luginës shqetësimet e padrejtësitë me të cilat ata ballafaqohen dhe angazhimet e institucioneve të Republikës sonë për ta”.
Sveçla ka paralajmëruar gjithashtu se do të veprojnë mbi parimet e reciprocitetit si vlerë e barazisë mes dy shteteve për raste të ngjashme.
Capture
