CIA amerikane ka publikuar një video në gjuhën ruse, në të cilën përpiqet të bindë agjentët e inteligjencës ruse që të ndryshojnë anën dhe të bëhen agjentë të dyfishtë për Uashingtonin. Drejtori i CIA-s, William Burns, tha në korrik se pakënaqësia e disa rusëve për luftën në Ukrainë krijon një mundësi unike për rekrutimin e spiunëve dhe se organizata nuk do ta humbasë atë. Videoja, e postuar në kanalin zyrtar të CIA-s në Xu, synon patriotët rusë të punësuar në komunitetin e inteligjencës, të cilët konsiderohen “të tradhtuar” nga korrupsioni në qarqet elitare dhe pajisjet dhe furnizimet e dobëta të forcave të armatosura ruse.
Videoja e CIA-s
“Ata përreth jush mund të mos duan të dëgjojnë të vërtetën. Por ne duam. Nuk jeni të pafuqishëm”, u thotë videoja gati tre minutëshe, e cila rendit edhe mënyrat për të kontaktuar me agjencinë amerikane. Personazhi kryesor në video, i shoqëruar me muzikë klasike melankolike, është një 35-vjeçar imagjinar i punësuar nga një agjenci e inteligjencës ushtarake. Ai është portretizuar si një patriot që e do Rusinë dhe dikur ka shërbyer si parashutist. “A kam guxim të mjaftueshëm për t’i bërë ballë kësaj tradhtie?” thotë ai në video, para se të zbulojë se e ka kuptuar se armiqtë e vërtetë në Rusi janë udhëheqja e korruptuar dhe elita. “Udhëheqja e lartë e shiti vendin për pallate dhe jahte, ndërsa ushtarët tanë përtypin patate të kalbura dhe qëllojnë me armë prehistorike. Njerëzit tanë detyrohen të paguajnë ryshfet për të gjetur punë”, vijon 35-vjeçari në videon, e cila vë përballë pamjet e një dimri të zbehtë rus me makina luksoze dhe shampanjë. Personazhi kryesor më pas tregon se patriotizmi i tij e shtyu të bashkëpunonte me CIA-n dhe në fund ai shihet duke kontaktuar agjencinë amerikane.
Reagimi i Rusisë
Vladimir Putin, ish-spiun i KGB-së që ka shërbyer në atë që dikur ishte Gjermania Lindore, i ka bërë thirrje shërbimit të sigurisë së brendshme të Rusisë FSB që të rrisë aktivitetin e tij për të kundërshtuar atë që ai ka thënë se po shton spiunazhin nga Perëndimi. Kremlini thotë se është bërë gjithçka për të siguruar që ushtria ruse të ketë pajisjet që i nevojiten për të qenë e suksesshme në atë që Moska e quan “operacioni i saj special ushtarak” në Ukrainë. Ajo ka hedhur poshtë si të rreme akuza të ndryshme për korrupsion. “E dini, kjo praktikë është mjaft e zakonshme, agjencitë e inteligjencës në mbarë botën përdorin shumë shpesh mediat dhe rrjetet sociale për të rekrutuar punonjës të rinj. Dhe ata e bëjnë atë gjatë gjithë kohës, CIA e bën atë çdo vit”, tha të martën zëdhënësi i Kremlinit Dmitry Peskov. CIA e publikoi videon në Facebook, në X dhe në Telegram, i cili është një aplikacion i njohur i mesazheve dhe rrjeteve sociale në Rusi. Peskov sugjeroi se CIA po humbiste kohën e saj duke u përpjekur të arrinte rusët në X, i cili është i ndaluar në Rusi dhe mund të arrihet vetëm duke përdorur një rrjet privat virtual, shumë prej të cilëve janë gjithashtu të ndaluar. Facebook është i bllokuar edhe në Rusi. “Dikush duhet t’i thotë CIA-s se në vendin tonë rrjeti social rus VKontakte është shumë më popullor se X i ndaluar. Dhe se audienca e VKontakte është shumë më e madhe,” tha Peskov.
Lidhja me Ukrainën
Nga ana tjetër, Agjencitë e inteligjencës të trajnuara nga CIA të Ukrainës kanë vrarë “dhjetëra” rusë dhe bashkëpunëtorë ukrainas që nga fillimi i pushtimit të Moskës, siç ka raportuar The Washington Post, duke cituar ish-zyrtarë të inteligjencës dhe sigurisë ukrainase, amerikane dhe perëndimore. Misionet përfshinin ekipe elitare që u formuan, u trajnuan dhe pajisën në “partneritet të ngushtë” me CIA-n, e cila vlerësohet të ketë shpenzuar “dhjetëra milionë” dollarë amerikanë për transformimin e agjencive të inteligjencës të Ukrainës që nga viti 2015. Kremlini ka akuzuar vazhdimisht Shtetet e Bashkuara se kanë luajtur një rol të drejtpërdrejtë në luftën në Ukrainë që kur Rusia pushtoi fqinjin e saj properëndimor 21 muaj më parë. Ukraina ka respektuar një politikë të mosmarrjes së përgjegjësisë për sulmet në tokën ruse ose në territoret e pushtuara që nga fillimi i pushtimit rus.
VAZHDO TË LEXOSH MË TEPËR PËR TEMËN
“Hija” e Putinit po rrethon edhe Lindjen e Mesme
