Sipas mediave serbe, serbët e zhvendosur nga Kosova do të bllokojnë sot qarkullimin në Rudar për tre orë, nga ora 12:00 deri në 15:00, për të gjitha automjetet e drejtuar nga shqiptarët.
“Serbët e zhvendosur nga Kosova sot do të bllokojnë qarkullimin në Rudar për tre orë nga ora 12:00 deri në 15:00 për të gjitha automjetet të drejtuara nga shqiptarët përmes Merdares, drejt Kurshumlisë, Nishit, Beogradit dhe më tej drejt Suboticës”, ka kumtuar Shoqata e Serbëve të Zhvendosur nga Kosova me seli në Kurshumli, raporton Euronews Serbia.
Sipas raportimeve, bllokada e rrugës do të zbatohet për shkak të “terrorit” ndaj serbëve në Kosovë, ku në veçanti përmendet kryeministri Albin Kurti.
“Bllokada e rrugës do të mbahet çdo të hënë për tre orë, derisa të përfundojë terrori i përditshëm ndaj popullit tonë në Kosovë. Terrori që po përjeton populli serb dhe populli tjetër joshqiptar është bërë i padurueshëm dhe është shumë afër një konflikti me pasoja të paparashikueshme”, pretendohet në këtë njoftim.
Kjo shoqatë pretendon se serbët e zhvendosur kanë pritur 25 vjet që të kthehen në shtëpitë e tyre dhe të fillojnë një jetë të re me fqinjët e tyre shqiptarë “të cilët nuk kanë kryer krime”.
Ata kërkojnë nga presidenti serb Aleksandar Vuçiç, ministri i jashtëm Ivica Daçiç dhe anëtarët tjerë të qeverisë serbe që “urgjentisht t’u dërgojnë një letër të gjitha organizatave relevante ndërkombëtare, për të ndalur urgjentisht terrorin dhe arrestimin e serbëve të pafajshëm”.
Ky grup ende kërkon “kthimin urgjent të një mijë ushtarëve serbë në Kosovë”, duke përmendur Marrëveshjen e Kumanovës dhe Rezolutën 1244.
E në listën e kërkesave ishte që të gjithë të zhvendosurit të kthehen në shtëpitë e tyre, “të cilat do të financohen nga Qeveria e Kosovës”.
