Presidenti turk Rexhep Tajip Erdogan ka vendosur të dërgojë partinë e tij të quajtur DAVA në zgjedhjet e Parlamentit Evropian në Gjermanimë 9 qershor, me politikanë të rangut të lartë gjerman që theksojnë se do të zgjerojë ndikimin turk në BE. DAVA është dega e fundit e AKP-së së Erdoganit, e cila është një parti nacionaliste antidemokratike me linja islamiste dhe është hapur kundër Izraelit. Sot, 2.5 milionë qytetarë të fesë islame jetojnë në Gjermani me pasaportë gjermane dhe të drejtë vote. Nëse ndryshohet ligji i shtetësisë, i cili është planifikuar për në prill 2024, mund të shtohen edhe 2.5 milionë shtetas gjermanë të fesë islame që kanë të drejtë vote. Bild analizon se DAVA, e cila shërben për të zbatuar dëshirat e Erdoganit në Parlamentin Evropian, matematikisht ka një potencial votimi prej pesë milionë votash.
Partia e re
Siç thuhet në njoftim, ata kërkojnë që “njerëzit me rrënjë të huaja të realizojnë plotësisht të drejtat e tyre”. “Këta persona në kërkim të apartamenteve, kur aplikojnë për punë, por edhe në shumë situata të përditshme si takimi me autoritetet dhe policinë, nuk pranohen si anëtarë të plotë të shoqërisë europiane” , thonë nga partia DAVA, duke deklaruar se duan të luftojnë kundër varfërisë, për fëmijët dhe për përfitime sociale për të moshuarit. Ata bëjnë thirrje për një “politikë pragmatike refugjatësh pa ideologji”, që përkthehet në hapjen e kufijve. Eksperti i çështjeve të brendshme të CDU, Christoph de Vries sheh një strategji të qartë këtu. “Ata duan t’i portretizojnë muslimanët si viktima të një shoqërie me shumicë raciste dhe të veprojnë si përfaqësues të interesave të tyre. Qeveria federale nuk duhet “në asnjë rrethanë ta pranojë lehtë kandidaturën e partisë. Besoj se është e rëndësishme që autoritetet tona të sigurisë të monitorojnë nga afër të gjitha aktivitetet e kësaj partie dhe lidhjet e saj me qeverinë turke dhe të ndërhyjnë nëse qeveria turke ushtron ndikim të drejtpërdrejtë”, këshillon de Vries.
Alarm në Gjermani
Themelimi i partisë, për “njerëzit me rrënjë të huaja” në Gjermani për të “kundërshtuar racizmin anti-musliman”, e cila, siç shkruan “Daily Mail”, është një degë e Partisë për Drejtësi dhe Zhvillim (AKP) të Erdoganit në Turqi, shkaktoi menjëherë reagime dhe shqetësime te partitë në Berlin. “Dega e Erdoganit që kandidon në zgjedhje këtu është gjëja e fundit që na nevojitet,” tha Cem Özdemir, Ministri gjerman i Bujqësisë, i cili ka një prejardhje turke emigrante, në rrjetin X, ish-Twitter. “Një degë e Erdoganit dhe AKP-së në Gjermani do të ishte një tjetër parti ekstreme në vend,” shkroi në të njëjtin rrjet social Jens Spahn, nënkryetar i partisë më të madhe opozitare, Kristian Demokratët (CDU) konservatore. “Aktualisht po shohim partitë që shfaqen kudo dhe qëllimi dhe ushtrimi i tyre i vetëm është që përfundimisht ta copëtojnë Evropën nga brenda”, tha kandidatja kryesore liberale gjermane Marie-Agnes Strack-Zimmermann kur u pyet për DAVA.
Shanset e partisë
Lista e kandidatëve për zgjedhjet evropiane duhet të dorëzohet deri më 18 mars. Nuk ka prag 5 ose 3 për qind atje, por me një bazë potenciale votuesish prej 5 milionë banorësh, DAVA mund të arrijë një rezultat prej rreth 10 për qind edhe në zgjedhjet federale. Partia e re pritet të drejtohet nga Teyfik Özcan, i cili këmbëngul se financat e partisë do të rriten brenda vendit. Në Gjermani është e paligjshme të marrësh fonde nga vendet e huaja. Gushtin e kaluar, Zyra Federale Gjermane për Migracionin dhe Refugjatët (BAMF) raportoi se më shumë se 23,000 shtetas turq kishin aplikuar për azil në vend deri në atë muaj të 2023, një rritje e mprehtë prej 203 për qind krahasuar me të njëjtën periudhë të një viti më parë. Të shtunën, Sahra Wagenknecht , të cilën disa e kritikojnë se është një politikane pro-ruse në Gjermani, nisi aleancën e saj populiste BSW të politikave të krahut të majtë me politikën e saj kufizuese të migracionit dhe retorikën e zhurmshme kundër luftës, ajo ofron një alternativë ndaj AfD-së së ekstremit të djathtë, kundër së cilës janë organizuar protesta në të gjithë vendin.
VAZHDO TË LEXOSH MË TEPËR PËR TEMËN
“Tensionet Turqi-Greqi mund të shkaktojnë përçarje në NATO”
