Mediat greke janë revoltuar për dënimin e Fredi Belerit.
Gazeta Kathemerini shkruan se Edi Rama vendosi të ndërpriste marrëdhëniet me Athinën zyrtare me dënimin e Fredi Belerit.
‘Zgjedhja e kryeministrit shqiptar Edi Rama për të ndërprerë lidhjet me Athinën u reflektua nga vendimi i së martës i Gjykatës Speciale Kundër Korrupsionit në Shqipëri që dënoi kryebashkiakun e zgjedhur etnik grek të Himarës, një komunë në jug të Shqipërisë, Fredi Beleri, në shkallë të parë, me dy vite burg për akuzën e blerjes së votës.’, shkruan gazeta.
Nërdsa gazeta tjetër greke protothema.gr skruan se “Misioni u realizua! ” referuar dënimit me 2 vite burg për akuzën e blerjes së votave ndaj Fredi Belerit nga GJKKO.
Artikulli i plotë i Protothema:
Gjykata shqiptare e SPAK-ut, pas një procesi të paprecedentë, edhe për standardet shqiptare, të montuar, aktakuza që ishte rrëzuar që në ditën e parë, i shërbeu vendimit politik të Edi Ramës dhe dënoi me 2 vite burg kryetarin e Bashkisë së Himarrës, Fredi Beleri. Beleri normalisht do të duhet të lirohet më 12 shtator, pasi deri atëherë ai në thelb do të ketë kryer dënimin pasi llogariten ditët e qëndrimit në paraburgim, por dënimi që do të rëndojë në dosjen e tij kriminale do të ketë sjellë shkarkimin e tij nga detyra. Ankimi që avokatët e tij do të bëjnë nuk pritet të shqyrtohet para muajit qershor, ndaj edhe nëse i ulet dënimi, pasi rrëzimi i vendimit nuk konsiderohet i mundshëm, lirimi i tij nga burgu vetëm do të përshpejtohet, ndërkohë që ka humbur përfundimisht postin e kryetarit të Bashkisë së Himarës.
Kështu, Rama duket se po e fiton lojën dhe, me gjithë shkeljet flagrante të çdo koncepti të shtetit ligjor, po merr Bashkinë Himarë, të cilin dëshiron ta mbajë nën kontroll për t’u shërbejnë interesave që janë pranë Kryeministrisë dhe janë të interesuara për “zhvillimin e turizmit” në këtë zonë. Me këtë metodë Rama beson se po neutralizon presionin e Athinës, e cila kërkonte leje për betimin deri në përfundimin e çështjes dhe njëkohësisht do të ketë lirinë e lëvizjes për të emëruar një kryetar të përkohshëm sipas zgjedhjes së tij dhe mundësisht të shpallë zgjedhje të reja në Himarë.
Dënimi i Belerit ishte i paracaktuar dhe Rama nuk hezitoi asnjë moment të zbatonte këtë plan të pacipë, duke llogaritur indiferencën ndaj kësaj çështjeje të BE-së dhe SHBA-së, pasi të vetmet reagime erdhën nga Athina, e cila ka ngritur pengesa drejt rrugës europiane të Shqipërisë. Dje reagoi dhe Ministria e Punëve të Jashtme të Greqisë ku ngrinte në pikëpyetje se është shkelur shteti i së drejtës dhe është vënë në pikëpyetje ligjshmëria e procesit të deritanishëm.
“Qeveria greke do të monitorojë nga afër çështjen dhe pret një gjykim të drejtë dhe objektiv në shkallën e dytë të juridiksionit”. Askush nuk e pret që në Gjykatën e Apelit çështja Beleri të ketë një fat ndryshe nga GJKKO, e cila tregoi se thjesht po zbaton urdhrat e lidershipit politik. Kjo tregon qartë se nuk është drejtësia, por pushteti politik që zgjodhi të metodizojë anulimin e rezultatit zgjedhor dhe uzurpimin e Bashkisë së Himarës.
Dhe me këtë formulim legjitimohet në thelb argumenti i palës shqiptare se e gjithë çështja Beleri është një çështje që po hetohet nga drejtësia e “pavarur” shqiptare dhe kësisoj nuk duhet të ketë ndërhyrje nga jashtë në punën e saj. Problematike është edhe fakti që nuk përmendej detyrimi i qeverisë shqiptare për të njohur rezultatet e zgjedhjeve në Himarë.
Pyetja e madhe tani është nëse Athina, pavarësisht mjedisit jo fort të favorshëm, do të insistojë në ushtrimin e presionit ndaj Tiranës për t’i dhënë mundësinë një gjykimi të drejtë dhe, së dyti, për të shfajësuar Belerin, në mënyrë që ai të marrë përsipër detyrën e tij në Bashkinë e Himarës, apo do të pranojë talljet e deritanishme të autoriteteve shqiptare që çuan në një grusht shteti shkarkimin e Belerit nga posti i kryetarit të Bashkisë së Himarës. Hapat e ardhshëm nuk kufizohen vetëm në mbrojtjen e të drejtave të Belerit dhe respektimin e vullnetit të qytetarëve himariotë të shprehur në zgjedhjet e majit 2023, por mbi të gjitha Rama nuk duhet të mendojë se tani ka një “çek bosh. në mënyrë që të nisë planet për “rigjenerimin dhe zhvillimin turistik” të Himarës me sekuestrimin e pronave greke.
Sepse nuk duhet harruar se çështja Beleri është maja e ajsbergut përsa i përket mbrojtjes së të drejtave të pakicës kombëtare greke në Shqipëri, ndërsa Athina ende pret që zoti Rama të përmbushë angazhimin për referimin e mosmarrëveshjes së kufirit detar në Hagë. Por qeveria greke nuk mund dhe nuk duhet të lejojë faktin e kryer që ishte Rama ai që vendosi me këtë urdhër gjykate. Marrëdhëniet e mira me Shqipërinë duhet të jenë synimi, por ato nuk mund të ndërtohen mbi këtë bazë, pasi çështja Beleri nuk ka të bëjë vetëm me një kryetar bashkie të zgjedhur nga minoriteti, por të gjithë pakicën kombëtare greke dhe mënyrën se si e trajton qeveria shqiptare. Dhe sigurisht e gjithë kjo është një shembull sesi vetë kryeministri shqiptar i trajton marrëdhëniet me Greqinë, duke pasur parasysh se do të vendosë kushte dhe Athina zyrtare thjesht duhet t’i pranojë.
Megjithatë, Beleri nuk ka treguar se i trembet vendimit të Gjykatës, duke u shprehur se do ta bëjë “betejën” deri në fund: “Ishte me precedentë të rremë penalë, pa prova, pa dëshmitarë përveç një të sponsorizuari nga policia, me një gjyqtar të “emëruar”. Krimi im është që shokët e mi himariotë më zgjodhën kryetar bashkie kundër planeve të kryeministrit shqiptar Edi Rama. Bashkimi Evropian dhe SHBA, a është kjo drejtësia që dëshironi për ne? Unë do të vazhdoj luftën time për Drejtësi dhe Demokraci në emër të bashkëqytetarëve të mi. Herët a vonë do të gjej drejtësi. Kam aq durim sa duhet për të arritur deri në fund të këtij rasti”.
