Pas evidentimit të shkeljeve të shumta në zgjedhjet e fundit lokale dhe parlamentare, duket se presidenti serb Aleksandër Vuçiç është dorëzuar para presionit ndërkombëtar. Ai deklaroi të shtunën se ka këshilluar kryesinë e Partisë Progresive Serbe (SN) që të shkojnë në zgjedhje të reja në Beograd, që pritet të mbahen në muajt në vijim. Partia Përparimtare Serbe e krahut të djathtë u shpall fituese e zgjedhjeve parlamentare dhe lokale të 17 dhjetorit. Por aleanca kryesore opozitare, Serbia Kundër Dhunës, këmbënguli se asaj iu vodh fitorja në Beograd dhe votimet për parlamentin e vendit u dëmtuan gjithashtu nga parregullsi të përhapura. Mosmarrëveshjet çuan në protesta të mëdha në rrugë. Nuk ishte menjëherë e qartë se kur do të mbahen zgjedhjet në Beograd, por e diela shënoi afatin zyrtar për konstituimin e pushtetit. “Konstatoj se aktualisht nuk ka kuorum për mbajtjen e seancës dhe ju njoftoj se nuk janë plotësuar kushtet e parapara me ligjin për vetëqeverisje lokale për konstituimin e Kuvendit të qytetit të Beogradit. Kjo do të thotë zgjedhje”, tha Toma Fila, kryetar i Kuvendit të Beogradit. Presidenti Vuçiç dhe partia e tij i kanë hedhur poshtë pretendimet për mashtrim duke i cilësuar ato sajime me qëllim të destabilizimit të Serbisë. Vëzhguesit ndërkombëtarë të zgjedhjeve, thanë në fillim të kësaj jave se votimet e dhjetorit u mbajtën në “kushte të padrejta”, pjesërisht për shkak të përfshirjes së presidentit dhe përparësive sistematike për partinë në pushtet. Raporti i një zyre të Organizatës për Siguri dhe Bashkëpunim në Evropë tha gjithashtu se zgjedhjet ishin “dëmtuar nga retorika e ashpër, animet në media, trysnia ndaj punonjësve të sektorit publik dhe keqpërdorimi i burimeve publike”. Ai renditi një sërë rekomandimesh që Serbia duhet të përmbushë përpara zgjedhjeve të ardhshme. Politikanët e opozitës thanë se zhvillimet në Beograd dëshmuan se presidenti Vuçiç humbi pushtetin prej një dekade në kryeqytetin serb. “Sot ata pranuan se i humbën zgjedhjet pavarësisht vjedhjeve të përmasave të mëdha. Qytetarët e Beogradit kanë treguar se nuk i duan ata”, tha Vladimir Obradoviç, një kandidat i opozitës për postin e kryetarit të Beogradit. Opozita dhe disa vëzhgues lokal të zgjedhjeve thanë se votuesit nga jashtë janë përfshirë në listat e votuesve në Beograd dhe janë dërguar me autobus në ditën e zgjedhjeve për të votuar për partinë në pushtet.
Porositë e Vuçiç
Nga ana tjetër, Vuçiç sa herë që e shikon punën keq në Serbi përdor kartën e Kosovës për të fituar pikë. Edhe dje, teksa foli pas mbledhjes së Partisë Progresive Serbe, tha se teksa qeveria e tij po merrej me problemet e serbëve me Kosovwn, opozita e përdor kwtw situatw pwr tw sulmuar vendin e tyre. “Vitin e kaluar kemi pasur probleme të panumërta për shkak të pogromit të organizuar të Kurtit kundër jetës serbe në Kosovë dhe Metohi”, tha Vuçiq dhe shtoi se gjatë gjithë asaj kohe në Beograd dhe Serbi kanë vuajtur presionin “nga ata që bënin sikur nuk e panë ose e panë mirë. , kështu që ata llogaritën në përdorimin e tij për një sulm shtesë ndaj vendit të tyre”. Ai theksoi se disa brenda vendit pas disa ngjarjeve në Kosovë dhe Metohi filluan të kërkojnë zgjedhje dhe se vetëm dy muaj më parë kanë thënë se nuk do të mbajnë zgjedhje. “Më pas më kërkuan me shkrim zgjedhje dhe më kërcënuan se nëse nuk i thërrasim do të dalin në rrugë dhe do të na thyejnë kockat dhe do të notojnë në Danub”. “Kur e dëgjova kërkesën e tyre dhe i thirra zgjedhjet, atëherë së bashku me miqtë e mi të huaj e futën Rezolutën e Turpit se Vuçiç është fajtor sepse i ka thirrur zgjedhjet kundër dëshirës së tyre”, tha Vuçiq. Ai theksoi se opozita kërkon të marrë tokën. “Që na e marrin shtetin e Serbisë, që ne u përgjigjemi emaileve me “Po, shef” dhe nuk do të jemi shërbëtorë të askujt, përveçse t’i shërbejmë popullit tonë”, tha Vuçiç.
