Për dy targa Gjermane të marra në një servis në Gjermani dhe më pas në vitin 2020 janë futur në Shqipëri përmes pikës së Morinës në Kosovë, gjykata e Tiranës ka dënuar me një vendim maksimal prej 5 vitesh, Nikoll Shernikun.
Vendimi është marrë nga gjyqtarja Enkeleda Dalipi, e cila mesditën e sotme deklaroi fajtor dhe dënoi për akuzën e “Sigurimit të kushteve për të kryer vrasje”, Nikoll Shernikun.
Gjatë dhënies së vendimit gjyqtarja Dalipi injoroi kërkesën e prokurorit Ardian Dyrmishi, i cili gjatë leximit të pretencës kërkoi dënimin e Shernikut me 3 vite burgim.
Por për shkak se i arrestuari kishte hyre në këtë proces me gjykim të shkurtuar, përfundimisht prokuroria kërkoi dënimin e Shernikut me 2 vjet burgim.
Nga ana tjetër përfaqësuesit ligjorë të Nikoll Shernikut, kërkuan para gjykatës deklarimin e pafajshëm të arrestuarit, pasi sipas tij në periudhën kur janë marrë targat në Gjermani, Sherniku ka qenë në burg.
Njëherësh edhe kur është kryer krimi i rëndë në Tiranë, ku mbeti e vrarë Mimoza Paja, Nikoll Sherniku ka qenë në burg për një ngjarje tjetër të ndodhur në Lezhë.
Por kjo masë dënimi me dy vite burgim e kërkuar nga përfaqësuesi i akuzës dhe pafajësia e kërkuar nga mbrojtësit, nuk është marrë në konsideratë nga gjyqtarja Enkeleda Dalipi, e cila ka vendosur të dënojë maksimalisht Shernikun me 5 vite burgim.
Sherniku, njihet në Lezhë si mik i Ervis dhe Brilant Martinaj, njëri i zhdukur pa gjurmë dhe tjetri i vrarë tek mbikalimi i Fushë-Krujës.
Por arrestimi i tij ka ndodhur në muajin qershor 2023, pasi sipas prokurorisë së Tiranës, ai kishte sjellë në vitin 2020 dy targa Gjermane, të cilat në muajin Mars 2023, u përdorën në një automjet tip BMW, nga u qëllua me armë në rrugën Don Bosko e për pasojë mbeti e vrarë Mimoza Paja dhe u plagosën Shehat Murati, Astrit Memaj, Genci Shaholli, Ermir Dajçuk, Emanuel Çala dhe 10-vjeçarja R.P.
Autorët e kësaj ngjarje të rëndë që tronditi Tiranës, sot e kësaj dite nuk janë identifikuar dhe arrestuar.
Ndërsa Drejtësia ka arrestuar vetëm Nikoll Shernikun, i cili i kishte sjellë targat nga Gjermania në Shqipëri, 3 vite përpara se të ndodhte krimi i rëndë.
Pritet që në vijim ky vendim të Apelohet nga Nikoll Sherniku, i cili thotë se ka qenë në burg kur ka ndodhur vrasja në zonën e “Don Boskos”./ Ora News
