Si i doli jashtë kontrollit Izraelit sulmi i 7 tetorit?

Identiteti i komandantit të Njësisë 8200 të Izraelit është një sekret i ruajtur mirë, duke qenë se ai drejton një nga agjencitë më të fuqishme të mbikëqyrjes në botë, të krahasueshme me Agjencinë e Sigurisë Kombëtare të SHBA-së.Por pasi u fsheh me sukses për më shumë se 20 vjet, shefi kontrovers i spiunazhit, Yossi Sariel, zbuloi aksidentalisht identitetin e tij në internet, shkruan Guardian . Shkelja e turpshme e sigurisë lidhet me një libër që ai publikoi në Amazon, i cili la një gjurmë dixhitale në një llogari private të Google të krijuar në emrin e tij, së bashku me një ID unike dhe lidhje me dosjet dhe kalendarët në profilin e tij. Është konfirmuar nga burime të shumta se Sariel është autori sekret i librit ‘The Human Machine Team’, në të cilin ai ofron një vizion radikal të marrëdhënieve midis personelit ushtarak dhe makinerive të transformuara nga inteligjenca artificiale. Libri, i botuar në vitin 2021 me një pseudonim të përbërë nga inicialet e tij, dhe në të Gjeneral Brigade YS, përshkruan sistemet e avancuara me inteligjencë artificiale të përdorura për herë të parë nga Forcat e Mbrojtjes të Izraelit, gjatë luftës gjashtëmujore në Gaza. Kjo shkelje e sigurisë ka të ngjarë të nënkuptojë presion të shtuar për Sariel. Njësia 8200, dikur e nderuar në Izrael dhe më gjerë për aftësitë e inteligjencës që rivalizonin ato të GCHQ të Mbretërisë së Bashkuar, besohet të ketë ndërtuar një aparat të madh vëzhgimi për të monitoruar territoret palestineze. Megjithatë,ajo nuk arriti të parashikonte dhe parandalonte sulmin vdekjeprurës të Hamasit në Izraelin jugor më 7 tetor të vitit të kaluar, ku u vranë rreth 1200 izraelitë.