Eksperti i Kriminalistikë Ervin Karamuço duke komentuar aksionin e fundit të SPAK që goditi krimin e organizuar, tha se për herë të parë në 112 vite shtet është arritur të paralizohet gati 41 për qind e krimit të organizuar me një aksion.
I ftuar në emisionin “Real Story” në ABC News, Karamuço theksoi se ajo çfarë është vënë re, është fakti se krerët e bandave flasin për toka, lojëra fati dhe drogë. Më tej ai shtoi se nëse Durim Bami kapet edhe ekstradohet është nga arkivat më të mëdha të bandave.
“Operacioni i vetëm në 112 vite shtet, kemi paralizuar 41 % të krimit në vend. Kemi pasur goditje të bandave, por jo të këtij niveli. Ky është një grup kompleks i lidhur me politikën, edhe me biznesin edhe me median. Deri tani janë dy gazetarë që dihen të përfshirë. Ish-shoku im i shkollës, i ndjeri gjyqtari Konomi, është për porositur për t’u vrarë nga një person që sot rezulton i vrarë. Personi që mendohet se ka vendosur eksploziv është në burgim të përjetshëm, ndërsa ata që e kanë porositur janë të lirë dhe janë në nivele të larta të biznesit të pushteti.
Pra ky është një biznes tokash. Edhe në diskutimet që bëjnë krerët e bandave, flasin për toka, lojëra fati e drogë. Këto janë tre burimet kryesore për të cilat janë konfliktuar thuasje shtatë grupe kriminale. Edhe vrasja e Santos dyshohet se ka lidhje me trafik ndërkombëtar të lëndëve narkotike. Tani e tutje mbase ndonjëri nga këto do të flasë dhe sigurisht, nëse Durim Bami kapet edhe ekstradohet është nga arkivat më të mëdha të bandave”, tha ai.
