Tensionet janë ndezur sërish në rajonin e Ballkanit Perëndimor. Rezoluta e OKB-së për gjenocidin në Srebrenicë tani po shkakton polemika. Politikanët serbë e shohin atë dokument si faj kolektiv mbi popullin e tyre. Madje, Milorad Dodik, udhëheqësi i serbëve të Bosnjës dhe presidenti i Republika Srpska (RS), pjesa e mbizotëruar nga serbët e Bosnje dhe Hercegovinës, njoftoi në mes të prillit përpara zyrtarëve të lartë të Beogradit se ai nuk shihte “asnjë arsye për të qëndruar në Bosnje”. “Do të kërkojmë pavarësinë”, tha Dodik. Në të njëjtën kohë, ai pohoi, siç e përsërit shpesh, se nuk kishte gjenocid në Srebrenicë. Por tani Ruanda dhe Gjermania i kanë propozuar OKB-së një rezolutë me të cilën Asambleja e Përgjithshme e OKB-së duhet ta shpallë 11 korrikun si Ditën Ndërkombëtare të Përkujtimit të Gjenocidit të Srebrenicës. Përfaqësuesit e qeverisë së Serbisë dhe të RS e kundërshtojnë ashpër këtë rezolutë, sepse besojnë se ajo do të shënojë kolektivisht popullin serb si fajtor. Tani benzinë zjarrit duket se i ka hedhur një krahasim me gjenocidin në Jasenovac dhe deklarat e fundit të kryeministrit të Malit të Zi, Milojko Spajiç, duke shkaktuar sërish kaos në rajon.
Kërcënimet e Dodikut
Dje, politikanët serbë nga Bosnja dhe Hercegovina, Serbia dhe Mali i Zi mbajtën një përkujtimore për viktimat e kampit të përqendrimit të Jasenovacit në Donja Gradina, por në të njëjtën kohë ata vazhdimisht shtuan numrin e të vrarëve atje dhe dërguan mesazhe duke mohuar gjenocidin e kryer kundër boshnjakëve në Srebrenicë në vitin 1995. Donja Gradina është një vend në bregun Sava në Bosnje dhe Hercegovinë përballë Jasenovacit dhe gjatë ekzistencës së kampit të Jasenovacit, atje janë ekzekutuar të burgosurit. Shifra e diskutueshme prej 700,000 të vrarëve u përsërit nga Presidenti i Republikës Srpska, Milorad Dodik, me pretendimet se në Kroaci “u mprehën sëpatat për njëqind vjet” për të filluar vrasjen e serbëve që nga viti 1941, duke sugjeruar se populli kroat është kolektivisht fajtor për krimet e ustashëve. “Gjenocidi nuk ndodhi atje, por ndodhi këtu,” tha Dodik.
Krahasimi me Jasenovac
Dodik theksoi në Donja Gradina se ajo që ndodhi në Srebrenicë dhe në këtë vend është e pakrahasueshme. “Nuk ka rëndësi as numri, sa e rëndësishme është kush qëndron pas gjithë kësaj”, tha Dodik dhe shtoi se rezoluta është një dokument politik. Ai ka përmendur se serbët kanë pasur dy lëvizje antifashiste, partizane dhe atdhetare dhe është krenar që nuk ka pasur ndarje mes serbëve gjatë luftës së fundit. “Ne jemi të bashkuar sot më shumë se kurrë, nuk jemi kurrë më të përkushtuar për të treguar të vërtetën e vërtetë”, theksoi Dodik dhe tha se presidenti Aleksandër Vuçiç dhe populli serb kanë shumë miq. Kryeministri i Serbisë Millosh Vuçeviç tha se ata që akuzojnë serbët për gjenocid në Srebrenicë duhet të kërkojnë falje. Ai njoftoi vazhdimin e luftës politike të Beogradit për të penguar miratimin e rezolutës për gjenocidin në Srebrenicë.
Ngërçi me Malin e Zi
Andrija Mandiç, kryetar i Kuvendit të Malit të Zi dhe një nga politikanët kryesorë pro-serbë në atë vend, e përdori përkujtimin për t’u ankuar për presionin ndaj serbëve në Mal të Zi, si dhe njoftimin se qeveria malazeze e kryeministrit Milojko Spajiç do të mbështesin rezolutën që dënon gjenocidin në Srebrenicë. “Ne do të bëjmë gjithçka të bashkuar si politikanë serbë së bashku me kishën ortodokse për ta ndalur këtë kryeministër nga një qëllim i keq dhe i rrezikshëm”, tha Mandiç, duke paraqitur tezën se gjenocidi është kryer vetëm në Jasenovac dhe jo në Srebrenicë. Siç ka shkruar media serbe “Blic”, Mali i Zi ka njoftuar se me ndërmjetësimin e SHBA, do të dorëzojë dy amendamente në Rezolutën për Srebrenicën. Por është interesante se vetëm pak javë më parë, pas kthimit nga Nju Jorku, presidenti serb Aleksandër Vuçiç tha se përgjigja e Serbisë ndaj Rezolutës për Srebrenicën do të jetë pikërisht, Jasenovac. E gjitha kjo tregon se sërish Serbia po kërkon të heqë përgjegjësinë e fajit që ka mbi supe dhe po kërkon ta kalojë “topin” diku tjetër.
