Autori i vrasjes së policit Novruz Cenalia në Fier është ende në arrati.
Detaje të reja janë zbardhur nga vrasja e efektivit të policisë në Fier, ndërsa janë shoqëruar në polici 12 persona.
Autori i vrasjes së policit Novruz Cenalia në Fier është ende në arrati. Pasi qëlloi me një plumb në kokë efektivin që po shkonte të merrte shërbimin, 23-vjeçari Asllan Mernica u largua nga vendi i ngjarjes.
Burime për mediat bëjnë me dije se kontrollet gjatë natës janë përqendruar në zonën Sulaj, Havaleas dhe Apoloni. Policia ka dyshimet se pasi braktisi makinën pranë vendit të vrasjes në fshatin Baltëz është larguar me këmbë drejt fshatit Havaleas dhe më pas në Apoloni.
Deri më tani janë shoqëruar në polici 12 persona për ngjarjen, kryesisht familjarë të autorit për të cilët janë marrë në pyetje nëse kanë dijeni për vendndodhjen e 23-vjeçarit.
Kërkimet për kapjen e tij vijojnë që prej ditës së djeshme, por deri më tani ende nuk ka asnjë gjurmë të autorit.
Policia ofron 30 mijë euro shpërblim për çdo informacion të vlefshëm që do të çojë në kapjen e 23-vjeçarit.
Si ndodhi ngjarja e rëndë?
28-vjeçari Novruz Cenalia u vra me një plumb në kokë më 13 maj 2024 në fshatin Baltëz të Fierit. Ai ishte nisur për të shkuar në punë, por u përfshi në një debat me Asllan Mernicën, 23 vjeç, për radhën e kalimit me makinë.
Në këtë moment, 23-vjeçari nxori pistoletën që e mbante me vete dhe me një tek plumb në kokë la të vdekur në vend punonjësin e Policisë së Shtetit. Më pas ai u largua nga vendi i ngjarjes.
I ati i Nevruz Cenalisë është po ashtu polic pranë sallës operative të Policisë Fier, i cili dyshohet të jetë i përfshirë në një vrasje të ndodhur vite më parë në vendlindje në Has, të mbyllur në dyert e drejtësisë, çfarë fillimisht e vendosi në tavolinën e hetuesve si pistë, por u sqarua shpejt që nuk kishte lidhje. Ndërkohë, autori i ngjarjes, Asllan Mernicën, rezulton të jetë vëllai i Kiri Mërnicës, i arrestuar për tentativë vrasje.
