“Futbolli ynë është rritur, cilësia gjithashtu, mund të garojmë më fort në Europë, ka ardhur momenti të shkojmë sërish në grupe”, këto janë shprehjet që i dëgjojmë shpesh në opinionin sportiv. Por kur vjen momenti për t’i provuar këto mendime apo gjykime, gjithçka pasohet nga një zhgënjim i shumëfishtë.
Kjo ishte kronika e skuadrave shqiptare në kompeticionet europiane. Nga të gjitha trevat kuqezi morën pjesë plot 10 klube shqiptare në kompeticionet e UEFA-s dhe rezultati ishte 9 eliminime dhe 1 kualifikim. Për t’u veçuar kualifikimi i Partizanit, që arriti të mposhtte me vështirësi maltezët e Marsaslok.
Të gjitha skuadrat e tjera u shoqëruan me zhgënjime. Për t’u shënuar eliminimi i Ballkanit nga UE Santa Koloma e Andorrës, një skuadër larg realitetit të suharekasve në letër, por që në fushë arriti të zhdukte diferencat dhe të siguronte një fitore me 11-metërsha.
Edhe Egnatia e pësoi në Champions po me penallti në dy duele tejet të komplikuar dhe në ndikuar nga jashtë ndaj boshnjakëve të Boracit. Asnjë diskutim për Deçiç dhe Strugën, që u eliminuan pa lënë gjurmë në Champions. Megjithatë, duhet thënë se të katërta ekipet kampion do të vijojnë garën në Ligën e Konferencës.
E njëjta gjë do të ndodhë edhe me Llapin, si skuadra e vetme shqiptare në Europa League. Ekipi nga Podujeva do të luajë në Ligën e Konferencës përballë danezëve të Brondbit. Merr fund aventura europiane për Tiranën, Malishevën, Shkëndijën dhe Vllazninë, që u mposht me turp nga islandezët e Valurit.
