Që PD-ja të jetë konkuruese në zgjedhjet e ardhshme, duhet ta zgjerojë sinorin e saj elektoral shumë përtej bërthamës së simpatizantëve të Berishës. Në këtë konkluzion mund të arrihet nga leximi i rezultateve të sondazhit kombëtar që publikova dje. Kështu, vetëm 16.5% e të anketuarve ishin simpatizantë të Berishës – goxha më pak se 42.5% që ishin simpatizantë të Ramës. Ndërkohë plot 34.3% e të anketuarve nuk simpatizonin asnjërin nga katër politikanët kryesorë.
Që Berisha të konkurojë me Ramën elektoralisht, duhet të bëjë për vete një pjesë të mirë të segmentit 34-përqindësh të elektoratit gri. Por problemi është se mbi 3/4 e këtij segmenti ka vlerësim pozitiv për punën e SPAK-ut. Dhe që të afrohen tek Berisha votuesit gri, duhet që ai të lavdërojë punën e SPAK-ut. Pikërisht të atij SPAK-u që e ka lënë në arrest shtëpie për muaj të tërë…
Nga ana tjetër, 90% e simpatizantëve të Berishës rezultuan në sondazh se kishin vlerësim negativ për punën e SPAK-ut. Dhe kjo është më se e kuptueshme – Berisha çdo natë nga dritarja e tij lëshon akuzat më të rënda për SPAK-un…
Teksa akuzat e Berishës ndaj SPAK-ut u pëlqejnë simpatizantëve të tij, elektoratin gri që e vlerëson punën e SPAK-ut e mbajnë larg Berishës. Dhe kjo situatë të kujton personazhin kryesor të romanit të mirënjohur amerikan “Catch-22” (përkthimi i përafërt në shqip: Gracka-22), i cili vuante ngaqë të gjitha zgjidhjet që gjente për të shpëtuar nga një situatë e vështirë i rezultonin të pashpresa.
Gjasat që Berisha ta ndryshojë qendrimin e tij ndaj SPAK-ut janë pothuaj zero. Por ky qendrim do t’i japë pak mundësi atij për ta zgjeruar sinorin elektoral të partisë përtej simpatizantëve të vet…
SHËNIM: Vetëm çereku i të anketuarve që kishin votuar për kandidatë për kryebashkiakë të Bashkimit për Fitore ishin nga segmenti gri aktual. Vjet kandidatet per kryebashkiake te atij koalicioni moren 500 mije vota.
VAZHDO TË LEXOSH MË TEPËR PËR TEMËN
