Pavel Durov, themeluesi dhe CEO i aplikacionit të mesazheve Telegram, u arrestua me mbërritjen në Francë të shtunën, më 24 gusht, si pjesë e procedurave që akuzojnë Telegram për bashkëpunim në raste të shumta të lidhura me trafikun e drogës, mbështetje për terrorizmin dhe sulmet kibernetike. Durov u arrestua në aeroportin Le Bourget, ku ishte rrugës për në Paris për mbrëmjen, i shoqëruar nga truproja dhe ndihmësi i tij, siç zbulohet nga kanali francez i lajmeve TF1/LCI .
Në qendër të çështjes janë akuzat e përsëritura për mungesë moderimi në platformën e menaxhuar nga Durov. Me gati një miliard përdorues në mbarë botën, një pjesë e madhe e tyre në ish-republikat socialiste, përfshirë Rusinë dhe Ukrainën, Telegram është bërë, së bashku me WhatsApp, një nga shërbimet më të rëndësishme të mesazheve në botë. Ky sukses nuk i detyrohet vetëm funksioneve të grupit, por edhe mungesës së moderimit.
Akuzat
Themeluesi me origjinë ruse i Telegram, Pavel Durov, u paraqit në një gjykatë franceze më vonë dje, pas arrestimit të tij në një aeroport të Parisit për shkelje të dyshuara në lidhje me aplikacionin e mesazheve. Burimet i thanë agjencisë së lajmeve AFP se miliarderi teknologjik franko-rus do të paraqitej në gjykatë pasi të ndalohej nga policia në aeroportin Le Bourget. Hetuesit francezë kishin lëshuar një urdhër për arrestimin e Durov si pjesë e një hetimi mbi akuzat për mashtrim, trafik droge, krim të organizuar, promovim të terrorizmit dhe bullizëm kibernetik.
Durov akuzohet se nuk ka ndërmarrë veprime për të frenuar përdorimin kriminal të platformës së tij dhe u ndalua pasi mbërriti në Paris nga Baku me avionin e tij privat të shtunën mbrëma. “Mjaft me mosndëshkimin e Telegramit,” tha një hetues i cili shprehu habinë që Durov fluturoi për në Paris duke e ditur se ai ishte një njeri i kërkuar.
Përçarja Rusi-Francë
Autoritetet ruse kanë akuzuar Francën se “refuzon të bashkëpunojë”. Ambasada ruse në Paris tha se Franca deri më tani kishte “shmangur angazhimin” për situatën. Rrethet politike dhe blogerët ushtarakë pro luftës ishin gjithashtu të shqetësuar, duke paralajmëruar për pasojat e mundshme negative të arrestimit për Rusinë dhe rusët, veçanërisht në lidhje me luftën ruse në Ukrainë. Disa politikanë të rangut të lartë rusë reaguan menjëherë ndaj arrestimit. Nënkryetari i Dumës së Shtetit, Vladislav Davankov, tha se i kishte bërë thirrje ministrit të Jashtëm rus Sergei Lavrov për të siguruar lirimin e Durovl.
“Arrestimi mund të ketë motive politike dhe të jetë një mënyrë për të marrë të dhëna personale të përdoruesve të Telegram. Ne nuk duhet ta lejojmë këtë,” tha ai në kanalin e tij Telegram, siç raportohet nga Financial Times. Andrei Klišas , kreu i Komitetit për Ligjin Kushtetues të Këshillit të Federatës Ruse, i përshkroi veprimet e Francës si “një luftë për lirinë e fjalës dhe vlerat evropiane”. Ambasada ruse në Francë tha se kishte kërkuar qasje konsullore në Durov, megjithëse nuk kishte një kërkesë nga përfaqësuesit e tij, sipas agjencisë së lajmeve Interfax. Një përfaqësues i Telegram dhe Durov refuzoi të komentonte këtë informacion. Dyshohet se para disa ditësh Durov ka kërkuar takim me Putinin në Baku dhe është refuzuar.
Panik në Moskë
“Telegrami është rrjeti kryesor i informacionit, mjeti i komunikimit dhe mjeti rus për të ndikuar në botë. Telegrami është aplikacioni numër një i mesazheve në Ukrainë. Ka 300 milionë përdorues në Indi dhe është lider në Amerikën Jugore dhe Latine. Ndikimi i Rusisë në botë mund të humbet”, kanë komentuar blogerët ushtarakë rusë.
“Durov akuzohet për mosbashkëpunim me policinë franceze në trafikun e drogës, pedofilisë dhe krimeve të tjera të rënda. Në muajt e ardhshëm, shumë qytetarë rusë mund të akuzohen për të njëjtat krime pasi të kenë akses në mesazhe të koduara”, paralajmërojnë ata. “Rrjeti rus i spiunazhit në Evropë mund të ekspozohet”, thonë disa komente të tjera.
VAZHDO TË LEXOSH MË TEPËR PËR TEMËN
