Pas vetëm njëqind ditëve të punës së Qeverisë së re të Republikës së Serbisë, kryeministri Millosh Vuçeviç shpalli rindërtimin e saj. Ai ka bërë të ditur se është e sigurt që do të ndodhë, por se nuk dihet saktësisht se kur, siç shkruan media serbe “Nova.rs”. Kryeministri Millosh Vuçeviç tha se periudha 100-ditore e punës së Qeverisë pas formimit të saj është një periudhë që shpesh shihet si një lloj “periudhe prove”. Vuçeviç njoftoi se rindërtimi është i mundur tashmë “në gjashtë muaj ose 12 muaj”. “Për të qenë plotësisht i saktë, rindërtimi i Qeverisë është i sigurt, por nuk është i kufizuar në kohë. Kjo ishte marrëveshja me Presidentin e Republikës, kur folëm për Qeverinë e re dhe kur mora mandatin për të formuar Qeverinë e re. Mendoj se të gjithë duhet të kenë një ndjenjë përgjegjësie. Dhe ndjenja e përgjegjësisë para së gjithash do të thotë që nuk je i çimentuar aty në ndonjë ministri apo në qeveri. Duke filluar nga unë së pari, natyrisht, në mënyrë që të mos ketë konfuzion”, tha kryeministri.
“Rrokada” në qeveri
Rindërtimi u njoftua në kohën kur në Serbi po organizohen protesta masive kundër minierave të litiumit. Dragan Popoviç, drejtor i Qendrës për Politikë Praktike, mendon se kjo është një taktikë politike. “Nuk është asgjë e re për Aleksandër Vuçiçin, ai e ka përvetësuar mjaft mirë inxhinierinë politike, veçanërisht spinin. “Këto histori për rindërtimin e Qeverisë sigurisht që janë shpërqendrimi dhe futja e një teme tjetër në opinion për të krijuar sa më shumë zhurmë”, thotë Popoviç. Ai shprehet se rindërtimi nuk është i rëndësishëm, ashtu siç nuk ka qenë e rëndësishme vetë zgjedhja e ministrave.”Nëse do të ketë rindërtim apo jo është një pyetje krejtësisht e parëndësishme që shërben vetëm për të larguar vëmendjen e publikut nga diçka për të cilën njerëzit janë vërtet të interesuar, si projekti Jadar”, tha ai. Bashkëbiseduesi i “Nova.rs” thotë se presidenti po i lë vetes opsione të ndryshme, duke nxjerrë në publik informacione të ndryshme, gjë që është pjesë e taktikës së ngatërrimit të njerëzve.
Marrëveshja me Vuçiçin
“Ai nuk do ta prezantojë veten si një lojtar kyç në minierat e litiumit në Serbi, por gjithmonë do të ketë një lloj pozicioni rezervë në mënyrë që nesër të mund të thotë përfundimisht se i ka dëgjuar të dyja palët dhe ka marrë një vendim. Në përgjithësi, gjithçka që ai bën është marketing politik dhe ajo që bën bazohet kryesisht në leximin e sondazheve të opinionit. Askush nuk mund të ndikojë seriozisht në politikën në atë fushë, pa marrë parasysh se kush është ministër, sepse ai nuk mund të marrë një vendim pa miratimin e Vuçiçit”, tha Popoviç. Ai thotë se kjo po u bën presion bashkëpunëtorëve të tij më të afërt dhe shton se kështu veprohet në të gjitha sistemet dhe organizatat autokratike që janë të strukturuara sipas parimit ushtarak, siç është SNS. “Ekziston ai element që ju duhet ta sundoni me frikë, nënshtetasit tuaj duhet të kenë frikë nga ju. Le të kujtojmë regjistrimet nga disa takime të brendshme të Partisë Përparimtare Serbe, Vuçiç gjithmonë i bërtet dikujt. Ky është sistemi i qeverisjes, presidenti sundon nga frika, ai nuk do bashkëpunëtorë me të cilët do të shkëmbente ide – larg kësaj. Ai mblodhi ndjekës dhe njerëz që kanë shumë bisht pas tij dhe më pas i bën presion, i tremb dhe i shantazhon. Nuk është asgjë e re dhe do të vazhdojë”, argumenton Popoviç.
Tërheqja nga politika
“Nova.rs” kujton se se më herët në mediat e regjimit, presidenti i Serbisë, Aleksandër Vuçiç, paraqitej si “plotësisht i vetëm në çështjen e Rio Tinto” dhe si dikush që “pret konflikt me Qeverinë e Serbisë për projektin Jadar”. Sipas të njëjtave media, Vuçiç i ka kërcënuar bashkëpunëtorët e tij me “tërheqje nga politika”. U shfaqën informacione se qeveria e Serbisë është e gatshme të anulojë projektin Jadar, por se nuk dëshiron një konflikt të hapur me presidentin dhe se Vuçiç po e pret atë “konflikt” në mënyrë që pas përfundimit të shpallë tërheqjen nga politika, në fund të mandatit të tij presidencial të vitit 2026.
VAZHDO TË LEXOSH MË TEPËR PËR TEMËN
