Nuk janë vetëm emigrantët që marrin apartamentin e ëndrrës në atdhe. Sipas të dhënave nga Banka e Shqipërisë, për periudhën prill-qershor 2024, të huajtë blenë apartamente tek ne, sidomos në bregdet, për një vlerë të përgjithshme 97 milionë euro. Asnjëherë investimet e huaja në prona të paluajtshme në Shqipëri nuk kanë qenë kaq të larta. Kjo shifër është 24 përqind më e lartë se periudha prill-qershor 2023. Investimet e huaja direkte në pasuri të paluajtshme arritën vlerën e 181 milionë eurove për periudhën janar-qershor 2024, ose 43 përqind më shumë(gati gjysma), krahasuar me 6-mujorin e parë të vitit të kaluar. Investimet e huaja në blerjen e apartamenteve, dyqaneve, vilave etj., pra në pasuri të paluajtshme, kryesuan për të tretin vit radhazi investimet e huaja të drejtpërdrejta në Shqipëri, të nxitura nga një bum i mirëfilltë i sektorit të turizmit. Që nga viti 2022, sektori i pasurive të paluajtshme është kthyer në sektorin e preferuar të investuesve të huaj, duke zënë gradualisht rreth 23 përqind të totalit të investimeve të huaja vjetore prej mbi 1.5 miliardë euro në Shqipëri.
Pra, gati një të katërtën. Pronat e blera nga të huajtë janë kryesisht në bregdet, por edhe në Tiranë, Durrës dhe në qytetet e tjera kryesore të vendit. Ato përdoren si për turizëm, përmes dhënies me qira, por edhe për pushime vetjake dhe për qëllime biznesi. Peizazhet piktoreske, historia e pasur dhe kultura e gjallë e Shqipërisë, e kanë vendosur vendin qartësisht në hartën turistike, duke çuar në pasoja të rëndësishme për tregun e saj të pasurive të paluajtshme(real estate). Me, sipas INSTAT, mbi 8.5 milionë vizitorë të huaj në periudhën janar-korrik 2024, ose 23 përqind më shumë se periudha janar-gusht 2023, industria në rritje e turizmit po riformon peizazhin e pronave në Shqipëri. Këto prona po orientohen nga kërkesa për pronat me qira, mundësitë e investimeve dhe tregun në zhvillim për qiratë afatshkurtra. Me një numër në rritje të turistëve që vizitojnë plazhet, vendet historike dhe qytetet e Shqipërisë, kërkesa për pronat me qira është rritur ndjeshëm. Kjo kërkesë është veçanërisht e theksuar në zonat bregdetare dhe qendrat kryesore urbane.
Tregu i pronave, të blera edhe nga të huaj, për dhënie me qira, ndryshon nga vilat luksoze tek apartamentet me çmime të përballueshme, duke iu përgjigjur një spektri të gjerë turistësh. Investitorët e huaj tërhiqen nga tregu i pasurive të paluajtshme shqiptare, për shkak të potencialit për kthime të larta nga investimi, veçanërisht në destinacionet turistike. Investimi i qeverisë në infrastrukturë, përmes rrjetit të rrugëve të reja dhe veprave të artit në to, po bën që zonat më parë të paarritshme, të bëhen më tërheqëse për investitorët e huaj në pasuritë e paluajtshme. Popullariteti i platformave të qirave afatshkurtra, madje edhe ditore, si Booking.com dhe Airbnb është rritur, me pronarë edhe të huaj të apartamenteve dhe vilave, që i shfrytëzojnë këto platforma për t’iu shërbyer turistëve që kërkojnë përvoja autentike. Zhvillimi i tregut të pasurive të paluajtshme për shërbime turistike nga investitorët vendas dhe të huaj ka sjellë përfitime ekonomike të dukshme për komunitetet lokale, duke përfshirë krijimin e vendeve të punës dhe përmirësimin e infrastrukturës lokale.
Sot, edhe në sajë të investimeve të qeverisë në infrastrukturën rrugore dhe në shërbimet e përmirësuara jetike si uji dhe energjia elektrike, ka një theks të rritur në turizmin dhe zhvillimin e qëndrueshëm të pasurive të paluajtshme, për të siguruar përfitime afatgjata për sektorin e turizmit dhe komunitetet lokale. Ekziston potenciali për diversifikim të mëtejshëm në tregun e pasurive të patundshme, duke përfshirë zhvillimin e pronave të ekoturizmit dhe turizmit kulturor. Ndërveprimi midis turizmit dhe pasurive të paluajtshme në Shqipëri paraqet si mundësi, ashtu edhe sfida. Ndërsa vendi vazhdon të rritet si një destinacion turistik, tregu i tij i pasurive të patundshme është i vendosur të zhvillohet më tej, duke ofruar mundësi tërheqëse për investitorët dhe pronarët edhe të huaj, ndërsa kërkon një zhvillim të qëndrueshëm dhe të përgjegjshëm. Sipas Bankës së Shqipërisë, që nga viti 2014, investimet vendase dhe ato të huaja në pasuri të paluajtshme në Shqipëri kanë arritur shifrën e 4 miliardë e 360 milionë eurove.
VAZHDO TË LEXOSH MË TEPËR PËR TEMËN
