Kandidati zyrtar për komisionerin e parë të mbrojtjes në Bashkimin Evropian është Andrius Kubilius, por është dikush shumë më i fuqishëm dhe më i pasur që tashmë po e bën atë punë, Armin Papperger, CEO i prodhuesit gjerman të armëve Rheinmetall, shkruan “Politico”. Ndërsa Kubilius pret fillimin e debatit të Parlamentit Evropian për Komisionin e ri të Ursula von der Leyen, Papperger tashmë po takohet me emrat më të rëndësishëm në industrinë e armëve dhe me politikanët kryesorë kombëtarë dhe po inicion vendime reale politike. Kreu i Rheinmetall, i cili ka udhëhequr kompaninë që nga viti 2013, “ka një vizion të qartë për të ardhmen e mbrojtjes së BE-së dhe pikëpamjet për vendet me të cilat duhet të negociohet dhe ato me të cilat nuk duhen negociuar”, tha një zyrtar i BE-së që u takua së fundmi me të.
Më i pasur se Brukseli
BE-ja po punon për partneritetet e mbrojtjes me Korenë e Jugut dhe Japoninë, për shembull, dhe po shikon gjithashtu mënyra për të punuar me MB. Një ekzekutiv i një kompanie armësh, i cili foli në kushte anonimiteti, tha se Papperger ishte një zë kyç në vendimin për të rritur shpenzimet evropiane të mbrojtjes dhe ai mbështet konsolidimin e sektorit të mbrojtjes të fragmentuar të BE-së. Kështu që Papperger u lidh me Leonardo të Italisë dhe BAE Systems të Britanisë për të prodhuar tanke moderne dhe automjete të blinduara bazuar në platformën Rheinmetall’s Lynx për ushtrinë italiane dhe punoi në kamionët Boxer dhe tankun Challenger 3 për Mbretërinë e Bashkuar. Për shkak të aktiviteteve të tij, Papperger ishte në shënjestër të vrasësve rusë dhe në fillim të këtij viti, agjencitë e spiunazhit parandaluan atentatin e tij. Ai është edhe në krye të kompanisë më të madhe të prodhimit të armëve. Aftësia për të prodhuar armë dhe municione e bën Papperger dhe drejtues të tjerë të mbrojtjes si Guillaume Faury i Airbus dhe shefi i Saab Micael Johansson kyç për riarmatimin e Evropës dhe dërgimin e armëve në Kiev.
Prodhuesi më i madh i armëve
Rheinmetall ka porosi me vlerë 48.6 miliardë euro. Në gjysmën e parë të këtij viti ka realizuar një fitim prej 404 milionë eurosh dhe pret të rrisë shitjet me 2 miliardë euro në vit. Vlerësohet se Rheinmetall ka marrë mbi 40 për qind të fondit prej 100 miliardë eurosh për modernizimin e ushtrisë gjermane. Nga ana tjetër, Kubilius është dukshëm më pak i fuqishëm financiarisht. Ai do të jetë në krye të Programit Evropian të Industrisë së Mbrojtjes (EDIP), i cili sjell 1.5 miliardë euro për kompanitë e mbrojtjes. Për të marrë më shumë para, ai do të duhet të bjerë dakord me vendet anëtare për rritjen e shpenzimeve të mbrojtjes gjatë shtatë viteve të ardhshme. Kjo është hera e parë që BE ka një komisioner të mbrojtjes, ndaj Kubilius, një ish-kryeministër i Lituanisë, do të duhet të përpiqet të marrë një pjesë të portofolit nga komisionerët e tjerë të fuqishëm. Për momentin, Parlamenti Evropian nuk ka as një komitet të plotë të mbrojtjes, i cili pritet të ndryshojë.
Bërja e marrëveshjeve
Por Papperger është gjithashtu një diplomat i aftë. Kur negociatat midis Leonardo dhe prodhuesit franko-gjerman të armëve KNDS u ndërprenë, Papperger shpejt arriti një marrëveshje me CEO të Leonardo, Robert Cingolani për të ndërtuar sisteme luftarake në tokë bazuar në teknologjinë Rheinmetall që synon tregun global të eksportit. Rheinmetall ishte gjithashtu ndër të parët që premtoi të prodhonte armë brenda Ukrainës. Nga ana tjetër, Kubilius do të duhet të punojë shumë për të fituar favorin e liderëve kombëtarë, ndërsa Papperger tashmë ka një lidhje të drejtpërdrejtë me krerët e shteteve. Pushtimi rus i Ukrainës dhe kërcënimi që ajo paraqet për BE-në i japin fund çdo paqartësie në lidhje me dobinë sociale të prodhuesve të armëve. “Isha i bindur që nga dita e parë se po bëja gjënë e duhur, përndryshe nuk do ta bëja”, tha Papperger në shkurt. “Jam i bindur se ne po mbrojmë NATO-n, Gjermaninë, Evropën dhe, së fundi, demokracinë tonë.
VAZHDO TË LEXOSH MË TEPËR PËR TEMËN
Pastrimi i parave në offshore mund të jenë thembra e Akilit për Putinin
Ballkani drejt ndalimit të trafikut të armëve të zjarrit
