Piloti rus Dmitriy Golenkov, i cili mori pjesë në operacionet e pushtimit rus të Ukrainës, u gjet i vdekur të dielën në qytetin Suponevo në rajonin Bryansk, njoftoi shërbimi i inteligjencës ushtarake ukrainase (GUR). Sipas informacioneve të publikuara nga GUR, Golenkov ka pësuar lëndime të shumta në kokë, ndoshta të shkaktuara nga një çekiç. GUR publikoi foto që dyshohet se tregojnë trupin e Golenkovit në një kopsht me mollë, pa marrë përgjegjësinë për incidentin, raporton Kyiv Independent.
Golenkov shërbeu si shef i shtabit të skuadronit rus të aviacionit. Ai ishte pilot i regjimentit të 52-të të bombarduesve të rëndë të Forcave Ajrore Ruse, i cili është i vendosur në Aeroportin Shajkovka, ku ndodhen bombarduesit Tu-22M3. Rusia i përdor këto avionë për të kryer sulme me raketa në Ukrainë. Golenkov mori pjesë në sulmet me raketa ndaj objektivave civilë ukrainas, sipas GUR, duke përfshirë qendrën tregtare Amstor në qytetin Kremenchuk, Rajoni i Poltava, në qershor 2022. Sipas autoriteteve ukrainase, më shumë se 1000 njerëz ndodheshin brenda ndërtesës në momentin e sulmit. 22 persona humbën jetën dhe dhjetëra u plagosën.
Golenkov dyshohet se është gjithashtu përgjegjës për një sulm në një ndërtesë apartamentesh në qytetin e Dnipro në janar të vitit të kaluar. Ishte një nga sulmet më vdekjeprurëse të Rusisë në Ukrainë, duke vrarë 46 njerëz, përfshirë gjashtë fëmijë. Golenkov reagoi me tërbim kur u kontaktua nga një gazetar ukrainas i cili donte të dinte nëse ai ndjente ndonjë faj për vrasjen e kaq shumë civilëve të pafajshëm në Dnipro. Fillimisht, ai u përpoq të mohonte çdo përgjegjësi, përkundrazi duke pretenduar se Ukraina dhe Krimea i përkisnin Rusisë.
