Liverpuli është në krye të tabelës së Premier Ligës me një avantazh të konsiderueshëm prej tetë pikësh ndaj Mançester Sitit. “Reds”- at kanë lënë vetëm pesë pikë gjatë gjithë sezonit. Me një fitore të dielën në “Anfield” ata do të shkëputeshin +11 nga skuadra e Guardiolës. Sot luajnë në 17:00 atë që është dhe supersfida e javës.
– Ata kryesojnë gjithashtu renditjen e Ligës së Kampioneve dhe janë skuadra e vetme që kanë siguruar pikët maksimale pas fitores së tyre të merituar ndaj Realit të Madridit 2-0 të mërkurën në “Anfield Road”.
– Nga 19 ndeshjet zyrtare të Liverpulit nën drejtimin e Arne Slotit këtë sezon, ata kanë fituar 17, duke shënuar 44 gola dhe duke regjistruar 10 ndeshje pa pësuar gol.
– Mançester Siti është pa fitore në gjashtë ndeshjet e fundit në të gjitha kompeticionet, duke humbur pesë prej tyre dhe barazuar 1 dhe ka pësuar dy ose më shumë gola në gjashtë ndeshje radhazi në të gjitha kompeticionet për herë të parë që nga maji 1963.
– Aktualisht Mançester Siti është në periudhën më të errët të rezultateve që kur në “Etihad” u ul Pep Guardiola. Kjo seri rezultatesh është edhe më e dobëta në karrierën e trajnerit katalanas.
– Siti nuk e ka mbajtur portën e pastër që nga 26 tetori dhe ka pësuar 17 gola që atëherë, duke dështuar të shënojë më shumë se një herë jashtë shtëpisë në katër ndeshjet e fundit.
– Pep Guardiola nuk ka kujtime shumë të mira nga vizitat e tij të kaluara në “Anfield”, pasi ka fituar vetëm një herë në nëntë transfertat e tij në Mersejsajd, duke humbur pesë dhe duke barazuar tre.
– Liverpuli ka fituar vetëm 1 nga nëntë përballjet e fundit në Premier Ligë kundër Sitit (5 barazime, 3 humbje), një fitore 1-0 në tetor 2022.
– Siti ka fituar vetëm 1 nga 21 ndeshjet e fundit të Premier Ligës në transfertë kundër Liverpulit (7 barazime, 13 humbje), duke i mundur 4-1 në shkurt 2021. Ata nuk kanë fituar në “Anfield” që prej majit të vitit 2003 (2-1).
