Ministri i Jashtëm në detyrë, Gent Cakaj tha se Shqipëria në qershor pret vendim pozitiv për negociatat duke theksuar se janë plotësuar të gjitha rekomandimet.
Në Këshillin e Integrimit, Cakaj apeloi se tashmë është momenti për dialog jo vetëm me BE-në por dhe me faktorët brenda vendit.
Cakaj i bëri thirrje faktorëve politikë që të bashkëpunojnë për këtë moment.
“Situata në Shqipëri është duke u polarizuar dhe ky nuk është thjesht një proces që kërkon dialog me vendet anëtare të BE-së, por mbase edhe dialog të brendshëm politik për të siguruar konsensusin e nevojshëm në implementimin e reformave të kërkuara në dritën e këtij objektivi”, u shpreh ai.
I pyetur në Këshill nëse zgjedhjet brenda Parlamentit Europian mund të shtyjnë negociatat, Cakaj tha se vonesa mund të ketë vetëm publikimi i raportit por jo dhënia e vendimit në qershor.
Nga ana tjetër, nënkryetari i Këshillit të Integrimit, Taulant Balla tha se pavarësisht djegies së mandateve dhe mungesës së opozitës, puna e mazhorancës për integrimin nuk ndalet.
Këshilli i Integrimit, pas disa muajsh pushim, zhvilloi mbledhjen e parë për vitin 2019, ndërsa u raportua edhe për ecurinë e refomës në drejtësi, si një nga kriteret themelore.
