Ish-ministri i Jashtëm, Ditmir Bushati reagoi për publikimin e lajmit ku ai etiketohej si përgjegjësi që ka emëruar konsullin e nderit të Shqipërisë në Nigeri, indianin Nitin Sandesara,i arrestuar pasi u shpallur në kërkim ndërkombëtar për veprën penale të pastrimit të parave.
Nëpërmjet një postimi në Facebook, Bushati mes tjerash shprehet se procedurat për emërimin e konsujve të nderit janë të përcaktuara qartë në Konventën e Vjenës për Marrëdhëniet Diplomatike.
Postimi i plotë:
“Një prej rregullave më elementare të gazetarisë dhe informimit publik në një shoqëri demokratike është verifikimi i fakteve, rregullave dhe procedurave ligjore që udhëheqin një proces, për të cilin raportohet. Sikundër kontaktimi i institucioneve dhe personave të përmendur në lajm me qëllim informimin e paanshëm dhe zbardhjen e të vërtetës.
Për sa kohë kjo nuk ka ndodhur me lajmin e publikuar në Top Channel, e ndjej për detyrë të informoj opinionin publik se procedurat për emërimin e konsujve të nderit janë të përcaktuara qartë në Konventën e Vjenës për Marrëdhëniet Diplomatike. Në çdo rast janë agjencitë e specializuara të vendit propozues dhe atij pritës që kryejnë verifikimin e pastërtisë së personit. Mjafton hulumtimi i dokumentacionit për këtë rast për të kuptuar se është zbatuar në menyrë rigoroze procedura”, shkruan Bushati.
