Drejtuesit e mjeteve që janë të fiksuar për kombimin e numrave në targën e mikinës tani kanë në dorë zgjedhjen. Drejtoria e Përgjithshme e Shërbimeve dhe Transportit Rrugor (DPSHTRR) njoftoi se ha hyrë në fuqi procedura për rezervimin online për targat e serive të veçanta.
Vendimi është marrë në kuadër të luftës kundër informalitetit. Shërbimi online ofron individëve mundësinë e personalizimin të targës duke zgjedhur formën dhe ngjyrën e preferuar. Sipas njoftimit , tarifa për targën Suvenir është 1500 Lekë të reja.
DPSHTRR bën të ditur se shërbimet për targat e serive të veçanta dhe tarifat përkatëse:
Për automjetet ofrohen dy kategori të ndryshme targash të veçanta: Kategoria e Parë përfshin të gjitha targat, tre numëroret e të cilave janë të njëjtë, pavarësisht nga çifti i shkronjave para dhe pas tyre, si edhe dy tre numërorët 001 dhe 007 që kanë kërkesa më të larta. Tipi : “111, 222, 999 dhe 001, 007”.
Tarifa për marrjen e këtij tip targe është 30,000 lekë plus tarifat standarde të shërbimit të regjistrimit të automjetit. Gjithashtu, përfshihen të gjitha targat, tre numërorët e të cilave fillojnë ose mbarojnë me dy zero, ose dy numrat anësorë janë njësoj dhe zero në mes, pavarësisht nga çifti i shkronjave para dhe pas tyre (përveç 001 dhe 007). Tipi: “002, 006, 009, 900, 600, 200, 101, 707, 606”.
Tarifa është 20,000 Lekë plus tarifat standarde të shërbimit të regjistrimit të automjetit.
Për moto mjetet ofrohet një kategori e veçantë: Kategoria e vetme përfshin të gjitha targat, tre numërorët e të cilave janë të njëjtë, pavarësisht nga çifti i shkronjave para dhe pas tyre. Tipi : “111, 222, 999”.
Tarifa është 10,000 Lekë plus tarifat standarde të shërbimit të regjistrimit të moto mjetit. Sipas DPSHTRR, për të gjitha kategoritë, përveç vlerës së shërbimit, do të aplikohet edhe vlera prej 7,700 Lekë që përfshin tarifat standarde për pajisjen me targë/regjistrim mjeti pranë DRSHTRR-ve për automjetet; ndërsa kjo vlerë për moto mjetet është 6,700 Lekë.
Sipas njoftimit, për automjetet nuk përfshihen tarifa RBS, Kalim Pronësie ose ndryshim formati targe nga drejtkëndëshe në katrore. Të gjithë aplikantët e këtij shërbimi do të kenë prioritet në kryerjen e procedurave, pa pritur në radhë.
DPSHTRR tha se të gjithë qytetarët/subjektet duhet të kryejnë regjistrimin online duke paraqitur të dhënat e kërkuara të mjetit dhe ato personale/të subjektit të sakta, sipas kartës së tyre të identitetit/niptit të aktivitetit.
Aplikuesit duhet të bëjnë kujdes në momentin e marrjes së shërbimit pranë DRSHTRR-ve, pasi duhet të jetë ose zotëruesi i mjetit ose person i autorizuar nga subjekti biznes, enti leasing, koncesionar, agjenci shërbimesh.
VAZHDO TË LEXOSH MË TEPËR PËR TEMËN
Nga 1 marsi ndërrimi i pronësisë së mjetit pranë DPSHTRR
