Pronari i kontenierit të bananeve Arbër Cekaj, ku u gjetën 613 kilogramë kokaine rrezikon të kthehet në Shqipëri.
Shkalla e parë e një gjykate gjermane ka pranuar kërkesën e palës shqiptare për ekstradimin e tij . Por vendimi i dhënë për Arbër Çekajn mësohet se është apeluar e duhet të pritet edhe vendimi i Apelit.
Po ashtu, Çekaj ka kërkuar azil politik në Gjermani, kërkesë e cila është në shqyrtim e sipër. Vendimi për ekstradimin është dhënë nga drejtësia gjermane rreth 20 ditë më parë nga gjykata penale e Dusseldorfit. Edhe në këtë seancë, Arbër Çekaj ka kërkuar të mos ekstradohet me argumentin se në Shqipëri i rrezikohet jeta.
Në Shqipëri, Arbër Çekaj akuzohet nga Prokuroria për Krime të Rënda për trafik të lëndëve narkotike. Në pranga është menaxheri Donald Lushaj dhe Armando Pezaku, shoferi i kamionit që transportoi kontenierët me banane dhe kokainë drejt magazinave të Arbri Garden në Maminas ku u zhvillua dhe operacioni i arrestimeve nga policia.
