Një zjarr i madh u shfaq këtë të premte në masivin pyjor me pishë në fshatin Patin të Bashkisë së Klosit. Vatra e zjarrit u përhap me shpejtësi për shkak të erës. Të parët që kanë nisur ndërhyrjen për shuarjen e flakëve kanë qenë banorë të zonës.
Drejt vatrës së zjarrit menjëherë është nisur edhe mjeti zjarrfikës i Bashkisë së Klosit si dhe punonjësit e këtij shërbimi. Kryetari i Bashkisë Klos Ilmi Hoxha ka urdhëruar stafin e shërbimit zjarrfikës të mbrojnë banesat, duke vendosur aty mjetin zjarrfikës.
Ndërkohë për shkak të mungesës së rrugës automoblisitike, për shuarjen e zjarrit janë përdorur pompa shpine nga zjarrfikësit. Një hektar pishë mësohet se është përfshirë nga flakët, ndërsa bashkia Klos tha se tashmë vatra është neutralizuar.
Ndërkaq një tjetër zjarr ka përfshirë dhe Cërrikun, ku mësohet se janë djegur rreth 10 hektar ullishte.
Zjarrfikësit kanë bërë të pamundurën për të vënë nën kontroll vatrat e zjarrit, por kjo ishte e vështirë, pasi era favorizonte flakët dhe i përhapte në sipërfaqen e pyllit. Në vendin e ngjarjes mbërritën edhe forcat e zjarrfikëses së Gramshit si dhe ato të Elbasanit dhe aktualisht zjarri është vënë nën kontroll.
VAZHDO TË LEXOSH MË TEPËR PËR TEMËN
“Shqipëria në flakë”, situata politike në vend e parë nga syri rus
