Dom Artur Jaku bën thirrje për ndërhyrjen urgjente në Kishën e Shën Venerandës në Pllanë të Lezhës.
Me anë të një postimi në facebook ai kërkon ruajtjen dhe mirëmbajtjen e kësaj bukurie të pashoqe.
Për Kishën që njihet nga vendasit me emrat kisha e Shën Barbarës apo Barbullës është shprehur edhe dom Nikë Ukgjini i cili thotë se: Rasti i Kishës se Shna Prendes apo Barbares në Pllanë dhe Kishës tjetër të Shna Prendës në bashkinë e Lezhës të shndërruara në hane, janë raste të qarta se duhet urgjentisht të kthehet ligji i rojeve pasivë për t i ruajtur e kujdesur.
Përndryshe edhe kjo pak pasuri materiale do na shkatërrohet qoftë nga dashakeqasit qoftë nga armiqtë e jashtëm.”
Sipas relacioneve dhe studimeve, kisha në fjalë është ndërtuar rreth shek. Xlll-XlV dhe përbëhet nga naosi dhe një hajat i vonë. Marin Bici në 1610 e pëshkruan si një hajat të bukur përpara kishës.
Ndërsa B.Orsini e quan si më të bukurën e Shqipërisë.
Në hyrje të kishës gjallojnë dy afreske pasbizantine, e në brendësi në murin perendimor ende shihen dy afreskë të stilit të protorenesancës.
Kisha përbëhet prej një vëllimi unik, mbuluar me çati druri e tavan dërrasash. Në krah të djathtë të absidës ka mure të rëna që të bëjnë të mendosh për një strukturë tjetër pranë saj.
