Zona e Krujës ka mbetur pa energji elektrike si pasoje e një defekti në rrjetin 110kV.
Shkak ka qenë era e fortë që ka pushtuar vendin ditën e sotme. Rreth 100 mijë banorë që jetojnë në këto zona janë në terr si pasojë e shkëputjes së energjisë elektrike.
OSHEE bën me dije se brigadat e OST janë në terren duke punuar.
Problematike është paraqitur situata dhe në Mamurras, ku edhe në këtë zonë nuk ka energji elektrike.
Ndërkohë, përkeqësimi i motit ka bërë që Porti në Bari të mbyllet, deri në një urdhër të dytë për ta hapur atë. Porti i Durrësit, për shkak të mbylljes së Portit në Bari, do të ndalojë nisjen e trageteve drejt qytetit bregdetar italian.
Për rrjedhojë është ndaluar udhëtimi i pasagjerëve si në Durrës, ashtu edhe në Bari. Kapiteneria e Barit ka deklaruar se e gjitha bëhet për të garantuar sigurinë lundrimore në situata detare me mot të përkeqësuar. Edhe Porti i Vlorës ka pezulluar të gjitha hyrjet e daljet e trageteve për shkak të motit të keq.
Temperaturat e ulëta kanë përfshirë edhe Tiranën, ku si pasojë e erës së fortë në sheshin “Skënderbej” u rrëzua pema e Vitit të ri. Po në kryeqytet raportohet për rrëzimin e disa pemëve në disa zona si para Kryeministrisë, pranë Pallatit të Kongreseve dhe në disa rrugë. Dëmtimi i rrjetit ka bërë që në Tiranë të ketë edhe probleme me energjinë.
Ndërkohë, në pikën kufitare në Kapshticë është pezulluar kalimi i mjeteve të tonazhit të rëndë deri më 6 janar, për të shmangur problemet dhe vështirësitë në qarkullim, si pasojë e prezencës së akullit në rrugë. Ndërkaq, do të lejohet kalimi i autobusëve dhe të automjeteve, që janë të pajisur me zinxhir.
