Libri i ish-këshilltarit të sigurisë, John Bolton përfshin informacione shpërthyese mbi presidentin e Amerikës, Donald Trump. Sipas mediave amerikane, Bolton akuzon ish-shefin e tij se kishte kërkuar ndihmë nga presidenti kinez Xi Jinping për të fituar një mandat të dytë në zgjedhjet e nëntorit 2020.
Ish-këshilltari i sigurisë shkruan se Trump kërkonte që Pekini të blinte prodhime bujqësore nga fermerët amerikanë dhe kishte mbështetur regjimin e ndërtimit të kampeve të përqendrimit për komunitetin shtesë në Kinë.
Lidhur me këto akuza ka reaguar edhe Richard Grenell, i dërguari i Trump, për të udhëhequr dialogun mes Kosovës dhe Serbisë, i cili pranoi se kishte një problem specifik me Bolton sa i përkiste çështjes së dialogut.
“Kur bëhet fjalë për Kosovën dhe Serbinë“, tha Grenell:“ne do t’i kemi të dy bashkë në Shtëpinë e Bardhë të shtunën e ardhshme për të folur për një lëvizje dhe marrëveshje historike. E megjithatë unë po luftoj vazhdimisht thashethemet për shkëmbime të territorit midis dy vendeve.”
“Kjo nuk është politika e Trump,” shtoi ai, “por kur gërmon thellë, të dy palët thonë: Epo, kjo është ajo që tha John Bolton.”
“Dhe kështu, unë po luftoj të gjitha thashethemet, sepse Bolton po ndiqte politikën e tij dhe jo politikën e Presidentit Trump”, shtoi Grennell.
Grenell tha se konflikti midis Bolton dhe Trump është një mikrokozmos i konfliktit midis Uashington DC dhe pjesës tjetër të Amerikës.
“Unë mendoj se ajo që duhet të bësh është kur të regjistrohesh për të punuar për një president si Trump, i cili dëshiron të ndryshojë Uashingtonin, nuk mund të jesh dikush si John Bolton, i cili jeton në Uashington DC, karriera e të cilit është Uashington DC, i cili dëshiron të kthehet në Uashington DC dhe të sigurojë të gjitha paratë e tij në Uashington DC”, tha Grenell.
“Kjo nuk është më një luftë për republikanët kundër demokratëve. Kjo është lufta e Uashingtonit, kundër pjesës tjetër të Amerikës”, përfundoi ai.
VAZHDO TË LEXOSH MË TEPËR PËR TEMËN
“Grenell kërkoi heqjen e taksës ndaj mallrave të Serbisë”
“Kosova dhe Serbia, po ta njihnin njëra-tjetrën…”
