Fundjavën e kaluar filloi sezoni 2020 në Formula 1, me garën e parë të zhvilluar në pistën austriake të Zeltweg. Shifrat e para flasin për një shikueshmëri të lartë. Sky Sport raporton se 1 milion e 330 mijë teleshikues e ndoqën live në Itali, ose 16% më shumë se një vit më parë.
Duke parë spektaklin e garës së parë, indiciet janë që shifrat të rriten këtë fundjavë, ku më 12 korrik do të zhvillohet gara e dytë në po të njëjtën pistë. Deri më tani janë konfirmuar 8 gara të Formula 1, një kalendar deri më 6 shtator, kur zhvillohet e Monzës në Itali. FIA duhej të publikonte edhe kalendarin për pjesën e mbetur të sezonit, por kjo gjë nuk ndodhi.
Prej kohësh përflitet se do të zhvillohen gara në pistën e Mugellos dhe Imolas në Itali, Sochit të Rusisë e Portimaos në Portugali. Por këto pista nuk kanë marrë viston akoma. Sipas “Gazzetta Dello Sport”, rastet e shumta me koronavirus të konfirmuara në Portugali kanë bërë që organizatorët e Formula 1 të stepen për t’i dhënë një shans kësaj piste për të mirëpritur një garë.
Ndaj, do të shihet situata edhe ditët në vijim për të konfirmuar kalendarin e garave. Shanse për të mirëpritur një garë ka Vietnami, që prej 2 muajsh nuk ka raste të reja me Covid-19. Gara e Vietnamit, e programuar më 5 prill është shtyrë dhe ka gjasa të zhvillohet në nëntor, bashkë me garat në Abu Dhabi apo Bahrein.
VAZHDO TË LEXOSH MË TEPËR PËR TEMËN
Ferrari zien nga polemikat, Vettel në shënjestër
