Teksa kompanitë farmaceutike janë në garë me kohën për krijimin e një vaksine të sigurtë që do të ndalte një herë e mirë përparimin e COVID-19, dilema e qeverive të vendeve të ndryshme të botës është nëse duhen detyruar apo jo qytetarët të bëjnë injeksionin.
Kryevirologu amerikan Entoni Fauci është kundër vaksinimit me detyrim, siç u shpreh në një forum të zhvilluar online për COVID-19. Ai shpreh bindjen se kurrë nuk do të ndodhë që vaksinimi i njerëzve të bëhet me detyrim, pasi asgjë nuk mund të bëhet jashtë vullnetit të dikujt.
Shumë ekspertë janë të mendimit se vaksina duhet të jetë e detyrueshme dhe të kryhet njëherësh në gjithë botën, sapo të hidhet në treg një e tillë e sigurtë, në mënyrë që të ndalet zinxhiri i përhapjes së virusit nga njeriu tek njeriu.
Ndërsa Kryeministri australian Scot Morrison u tërhoq nga qëndrimi i tij i mëparshëm se vaksina duhet të jetë e detyrueshme. Duke folur për mediat australiane, ai u shpreh se duhen ndërmarrë veprime për bindjen e njerëzve të bëjnë vaksinën, por ajo nuk mund të jetë kurrsesi e detyrueshme.
