Organizata britanike bamirëse “Save the Children” paralajmëroi se gati 70,000 fëmijë në Afrikën nën-Sahariane janë në rrezik të vdesin nga uria ekstreme, para fundit të këtij viti. Sipas kësaj organizate, pandemia e COVID-19 po ushtron presion të madh tek disa komunitete në vështirësi.
“Save the Children” tha se është duke trajtuar një numër në rritje të fëmijëve që vuajnë nga kequshqyerja, në klinikat e saj në Afrikën lindore dhe jugore. Organizata tha se masat e bllokimit për shkak të koronavirusit, kanë bërë që familjet në kontinent të përballen me përkeqësim serioz të kushteve të jetesës dhe që ushqimi të bëhet gjithnjë e më i vështirë për t’u gjetur ose thjesht shumë i shtrenjtë.
Sipas analizës së saj, mbi 67,000 fëmijë mund të vdesin në vitin 2020. Paralajmërimi pason një të ngjashëm nga Programi Botëror i Ushqimit i Kombeve të Bashkuara për rritjen e niveleve të urisë në të gjithë botën, për shkak të koronavirusit. Përpara pandemisë, komunitetet më së shumti në rrezik janë përballur me pasiguri ushqimore për shkak të përmbytjeve dhe zhvendosjeve në Afrikën lindore.
