Ambasadori i BE-së në Shqipëri, Luigi Soreca, ka reaguar për dhunën në protestën e të rinjve, pas vrasjes së 25-vjeçarit Klodian Rasha.
Përmes një postimi në rrjetet sociale, Soreca shkruan se dhuna duhet të shmanget në çdo rast dhe nga të gjitha palët.
“Shumë i pikëlluar nga ngjarjet e ditëve të fundit. Mendimet e mia janë me familjen e Klodian Rashës. Tani është thelbësore që kjo ngjarje tragjike të hetohet si duhet dhe të vendoset drejtësia, dhe shqetësimet e shprehura paqësisht të dëgjohen. Por dhuna duhet të shmanget në çdo rast, nga të gjitha palët”,- shkruan Soreca.
Edhe ambasadori gjerman Peter Zingraf ka bërë thirrje që të shmanget dhuna në protesta.
Sipas tij, dhuna nuk është një zgjidhje.
“Ngjarjet e ditëve të fundit më mbushin me shqetësim dhe trishtim. Vdekja e të riut më ka prekur edhe mua shumë. Është e rëndësishme dhe e drejtë, që kjo ngjarje të zbardhet plotësisht. Mendimet e mia janë pranë familjes së viktimës. Por ajo çka na mëson gjithashtu ky rast tragjik është – dhuna nuk mund të jetë zgjidhja. Ushtrimi i lirë i të drejtës për protesta është thelbësor për çdo demokraci. Por, edhe kur bëhet fjalë për gjëra shumë emocionale dhe elementare: vetëm protestat paqësore legjitimohen si demokratike. Unë i bëj thirrje të gjitha palëve, të heqin dorë nga dhuna”, shkruan ambasadori gjerman Peter Zingraf.
Prezenca e OSBE në Tiranë ka reaguar për aktet e dhunës këto ditët e fundit, pas vrasjes së Klodian Rashës.
“Ligjshmëria dhe rendi publik janë në themel të demokracisë dhe shtetit të së drejtës.
Prezenca e OSBE-së në Shqipëri shpreh keqardhjen e saj të thellë për vdekjen e Klodian Rashës dhe besimin se ajo do hetohet si duhet.
Mendimet dhe lutjet tona janë për familjen e tij.
Tani, ne bëjmë thirrje për përmbajtje nga çdo lloj dhune dhe që të lejohet ligji të veprojë”, thuhet në reagimin e OSBE
Edhe Ambasadori britanik në Tiranë Duncan Norman ka reaguar.
Norman thekson se drejtësia duhet të vendoset për këtë rast, ndërsa shton se zgjidhja duhet të vijë në mënyrë paqësore.
Deklarata e ambasadorit britanik Duncan Norman:
| Deklaratë e Ambasadorit britanik Duncan Norman:
“I shprehim solidaritin dhe ngushëllimet familjes së Klodian Rashës. Drejtësia duhet të vendoset. Dhe duhet parë se po vendoset.
Ne e kuptojmë pse njerëzit janë të zemëruar dhe mbështesim të drejtën për protestë paqësore. Le t’i zgjidhim gjërat në mënyrë paqësore.”
