Prokuroria e Tiranës ka zbardhur akuzën ndaj efektivit të policisë, Nevaldo Hajdaraj, i cili vrau me armë zjarri 25-vjeçarin Klodian Rasha.
Përmes një njoftimi zyrtar, Prokuroria ka lajmëruar se tashmë Nevaldo Hajdaraj do të akuzohet për “vrasje me dashje”.
Sipas tyre, filmimi i sekuestruar jep një tablo të qartë të vrasjes. Më tej njoftohet se arma e gjetur në pellgun e ujit, ka mbetur ende e paidentifikuar. Me ndryshimin e akuzës, polici Nevaldo Hajdaraj rrezikon deri në 20 vite burg, ndërsa me akuzën e parë “tejkalim i kushteve të vetëmbrojtjes” rrezikonte 7 vite burg.
Prokuroria ka sekuestruar pamjet filmike të subjekteve përreth vendit të ngjarjes, të cilat kanë zbardhur dinamikën e ngjarjes, ku bëhet me dije se polici Nevaldo Hajdaraj ka qëlluar ndërsa ka qenë i shtrirë. Një fakt që vërtetohet edhe nga dëshmia e kolegut të tij.
Në filmimet e siguruara nga Prokuroria duket se efektivi e ka qëlluar dy herë me armë Klodian Rashën, ndërsa ky i fundit po largohej me vrap.
