Sot në orën 17:00 u mblodh parlamenti dhe votoi në seancën e jashtëzakonshme shkarkimin me 95 pro të kryeministrit Rama si ministër për Europën dhe Punët e Jashtme.
U votua me 94 vota pro Olta Xhaçka si ministre e Jashtme dhe gjithashtu me 94 vota pro Niko Peleshi si ministër i Mbrojtjes. Xhaçka mori 4 vota kundër dhe 1 abstenim ndërsa Peleshi 3 kundër dhe 2 abstenim.
Ndërkohë në Institucionin e Presidentit të Republikës u zhvillua sot pasdite ceremonia e betimit të dy anëtarëve më të rinj të kabinetit qeveritar, Ministres për Evropën dhe Punët e Jashtme, znj.Olta Xhaçka dhe Ministrit të Mbrojtjes, z.Niko Peleshi.
Pas ekzekutimit të himnit kombëtar, Ministrja Xhaçka dhe Ministri Peleshi u betuan me dorën mbi Kushtetutë para Kreut të Shtetit: Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të anëtarit të Këshillit të Ministrave.
Presidenti i Republikës, Sh.T Z. Ilir Meta u dorëzoi dekretet përkatëse të emërimit Ministres Xhaçka dhe Ministrit Peleshi, duke u uruar suksese në detyrat e tyre të reja e të rëndësishme.
Në ceremoninë e betimit ishin të pranishëm Sekretari i Përgjithshëm i kryeministrisë, z.Engjëll Agaçi si dhe anëtarë të Kabinetit të Presidentit.
