Ministrja e Infrastrukturës dhe Energjisë Belinda Balluku foli sot në Kuvend mbi Aktin Normativ, që vendos zgjatjen me 3 muaj të afatit të vlefshmërisë së certifikatës së kontrollit teknik të mjeteve me motor dhe rimorkio.
Ministrja theksoi se shtyrja e afatit të kolaudimit do të shmangë grumbullimet dhe radhët duke ulur rrezikun për jetën e qytetarëve në një kohë kur vendi përballet me Covid-19.
“Nga ekspertët e Drejtorisë së Përgjithshme të transportit Rrugor është propozuar që duke pasur parasysh këtë fakt teknik, mos amortizimin e këtyre mjeteve, por mbi të gjitha nevojën për të kufizuar rrezikun që vjen prej pandemisë kemi kërkuar që të shtyhet vlefshmëria e afatit të kontrollit teknik me 3 muaj.
Për të qenë në një linjë me të gjithë udhëzimet e Komitetit Teknik Ekspertëve, si dhe për të ruajtur sigurinë fizike të operatorëve dhe qytetarëve kemi vendosur të shtyjmë afatin e vlefshmërisë së certifikatës të kontrollit teknik me 3 muaj.
Qytetarët që kanë apo kanë pasur datën e kontrollit teknik në këto 3 muaj, ata kanë edhe 3 muaj kohë për të përcaktuar datën e kontrollit të radhës.
Efekti primar i vendimit është se do ketë ulje të grumbullimit dhe të radhëve duke ulur rrezikut për jetën e qytetarëve. DPSHTRR është duke marrë masat për sigurinë e operatorëve dhe qytetarëve.
Duke votuar këtë akt normativ për zgjatjen e afatit të vlefshmërisë së certifikatës të kontrollit teknik, për mjetet me motor dhe rimorkio, ne kemi mundësi të shtojmë sigurinë duke siguruar një shërbim të përshtatshëm brenda kushteve të përcaktuara nga Komiteti i Ekspertëve”, u shpreh Balluku.
VAZHDO TË LEXOSH MË TEPËR PËR TEMËN
