Duket se edhe mediet kanë luftën e tyre sa i takon artikujve për Lionel Messin. Gazeta argjentinase “Olé” sot ia ka kushtuar faqen e saj të parë si përgjigje “El Mundo”, referuar ekskluzives së kësaj të fundit, botuar të dielën në lidhje me kontratën e Messit.
“Olé” boton një analogji, duke imituar formatin që “El Mundo” përdori dje për të zbuluar detajet e kontratës së Leo. Ndërsa “El Mundo” titulloi “Kontrata faraonike e Messit”, Olé u kundërpërgjigj me titullin “IA VLEN”, duke iu referuar faktit se Leo është më i miri i historisë së Barcelonës.
Dhe këtë e thonë shifrat. Në të njëjtën foto të syve të Messi, gazeta “Olé” publikon këto shifra: 650, 260, 755, duke iu referuar golave, asisteve dhe ndeshjeve, përkatësisht, të yllit argjentinas, në vend të: 555, 237, 619 €.
Përveç kësaj, gazeta e njohur argjentinase i përgjigjet “El Mundo” me: “A i donit shifrat e Messit? Këtu i keni ato. Rrjedhja e kontratës, një tradhti ndaj së cilës ai iu përgjigj me një gol tjetër”. Në kopertinë, “Ole” përfshin gjithashtu deklaratat e trajnerit të Barçës, Ronald Koeman, në lidhje me këtë çështje.
