Shkëlzen Kastrati, 41 vjeç, mbeti i vdekur paraditen e djeshme në Fier pas një atentati të mirorganizuar, në rrethrrotullimin e Sheqit. Ai udhëtonte me mjetin e tij tip Mercedes Benz ML, kur u qëlllua me dy plumba që i morën jetën.
Burime nga grupi i hetimit bëjnë me dije se nga arma “Scorpion” janë bërë dy qitje dhe të dy plumbat e kanë kapur 41 vjeçarin. Një prej plumbave e ka kapur Shkëlzen Kastratin në ballë dhe tjetri në krah.
Ai ndërroi jetë në vendngjarje, ndërsa autorët që dyshohet se janë profesionistë, u larguan me një mjet tip Range Rover të cilit i vunë flakën në Mbrostar. Kamerat e sigurisë të bizneseve në zonë janë sekuestruar nga grupi i hetimit dhe pritet që ato të hedhin më shumë dritë mbi ngjarjen dhe autorët.
Shkak paraprak bëhet me dije se është hakmarrja, pasi vëllai i Shkëlzen Kastratit ka rënë edhe më herët pre e një atentati, ndërsa vetë është përfshirë në disa ngjarje kriminale. 41 vjeçari do të përcillet sot për në banesën e fundit.
